Атырдьах ыйын аҥаара кээрэтилиннэ. Атырдьах ыйын 14 күнүгэр I Ыспааһап буолбута. Ити эргин үгүс улуустарга күүскэ ардаата. Салгыы атырдьах ыйын 19 күнүгэр II уонна атырдьах 28 күнүгэр III ыспааһаптар кэлэн ааһаллар. Бу күннэри син биир күн-дьыл бэлиэтээн ааһара буолуо.
Төһө от кэбиһилиннэ?
Төһө да ардаабытын үрдүнэн үгүс улууска от үгэнэ бара турар. Тыа хаһаайыстыбатын пресс-сулууспата иһитиннэрбитинэн, атырдьах ыйын 15 күнүнээҕи туругунан Саха сирин үрдүнэн 9754 звеноҕа барыта 31507 киһи ходуһаҕа оттуу сылдьар, 11785 тыраахтыр көмөлөһөр. Этиллибит күҥҥэ 242513 гектарга от охсуллубут, 237550 туонна от чөкөтүллэн кэбиһиллибит. Былаантан 54 бырыһыана эрэ кээрэтиллибит.
Мобильнай биригээдэлэр өрүһүйүөхтэрэ
Хаһан да буоларын курдук быйылгы оттооһуҥҥа сүрүн оруолу мобильнай биригээдэлэр ылар буоллулар. Билиҥҥи туругунан өрөспүүбүлүкэ үрдүнэн тэриллибит мобильнай биригээдэлэр ыраах сытар ходуһаларга тиийэн, барыта 43,5 тыһыынча туонна оту бэлэмниэхтэрэ. Атырдьах ыйын 15 күнүнээҕи туругунан өрөспүүбүлүкэ үрдүнэн 141 анал биригээдэ барыта 5391 туонна оту чөкөппүт.
Халаан уутун кэнниттэн
От ыйын саҥатыгар Дьааҥы уонна Кэбээйи улуустарыгар аһара ардаабытын түмүгэр, хайалартан тардыыланар үрэхтэр хааларыттан тахсан, нэһилиэнньэлээх пууннар уонна оттонуллар ходуһалар ууга былдьаммыттара. Үөһээ Дьааҥы улууһугар 17 нэһилиэк оттуур сирэ-уота, улуус ходуһатын 80 %-на ууга барбыта. Сорох нэһилиэктэргэ дьон бэйэтин күүһүнэн ууну түһэрэргэ ылсыбыттара. Улуус үрдүнэн сүөһүлэрин-сылгыларын кыстатарга барыта 8200 туонна от наадата быһаарыллыбыта. Атырдьах ыйын 15 күнүнээҕи туругунан, 8200 туонна былаантан баара-суоса 2162,9 туонната эрэ кээрэтиллибит. Былаантан 26,4 бырыһыана эрэ. Билиҥҥи туругунан улуус үрдүнэн 290 звено үлэлиир, мантан 14-дэ механизированнай аҥаардаах, биирэ атынан уонна 275-һэ хары күүһүнэн оттууллар. 15 тиэхиньикэ көмөлөһөр, барыта 824 киһи ходуһаҕа үлэлии сылдьар. Билиҥҥи туругунан 1310 гектар иэннээх сиргэ от охсуллубут, 873 туонна от кэбиһиллибит. Былырыын баччаларга 4216 туонна кэбиһиллибит эбит. Онон көрөрбүт курдук, чахчы бытаарыы тахсыбыт. Кэбээйи улууһа. Быйыл улуус үрдүнэн барыта 14000 туонна от бэлэмнэниллиэхтээх буоллаҕына, билиҥҥи быһаарыынан 7583 туонна эрэ оттонуллар кыахтаах. Иннинээҕи былаантан 54 бырыһыана эрэ туолар туруктаах Билиҥҥи туругунан 236 звено оттууруттан 135-һэ механизированнай аҥаардаах, биирэ атынан уонна 94-дэ хары күүһүнэн сылдьаллар. Барыта 100 тиэхиньикэ көмөлөһөр, 577 киһи ходуһаҕа биир салаа от иһин туруулаһар. Бу нэдиэлэтээҕи туругунан 2847 гектар иэннээх сир охсуллубут, 3354 туонна от кэбиһиллэн чөкөтүллүбүт. Былаантан 24 бырыһыана эрэ кээрэтиллибит. Ааспыт сыл баччаларыгар 5957 туонна оттоохторо. Улуус үрдүнэн тэриллибит мобильнай биригээдэлэр атын ыраах сирдэргэ тиийэн 2200 туонна оту бэлэмниир соруктаахтар.
Үөһээ Бүлүүгэ арыыларга өрүс уута таҕыста
Эмиэ аһара ардаабытын түмүгэр, арыыларга уу тахсан, охсуллубут оту, бугуллары ылан улаханнык моһуоктаата. Үлэ барыытын бытаарта. Билиҥҥи балаһыанньаны билсээри, Үөһээ Бүлүү улууһун тыатын хаһаайыстыбатын начаалынньыга Сергей Ивановка эрийбиппитигэр: «Быйылгы былааммыт 26000 туонна, былырыыҥҥыбыт 24000 туонна этэ. Билиҥҥи туругунан 60 бырыһыанын оттоотубут. Бу күннэргэ аһара ардаан, уу тахсан, элбэх от ууга барда. Төһө хоромньу тахсыбытын ааҕа сылдьабыт. Өрүс уута халааннаан дьон охсубут ото, бугуллара, рулоннаммыт отторо ууга былдьанна. Бу күннэргэ ууга барбыт ходуһаларга тиийэн, балаһыанньаны билистибит. Оттонуллар ходуһаларынан оҥочолоох мотуорканан киирэн кэрийэн көрдөххө, дьон хас да күннээх көлөһүннээх үлэтэ, ороскуота ууга былдьаммыта олус хомолтолоох. Уу соһуччу тахсан, отчуттар кыайан быһаабатах отторо үксэ ууга туран хааллылар. Балаҕаннаах, Ороһу, Дүллүкү оттонор арыыларын уу ылла. Ордук элбэх хоромньуну Дүллүкү нэһилиэгин олохтоохторо көрүстүлэр. Элбэх сир ууга барбыт», — диэн иһитиннэрдэ
Салгыы видео-устууну көрүҥ.