Киин куоракка олорор дьон төрөөбүт-үөскээбит нэһилиэктэригэр өйөбүлү оҥороллорун истэн, үтүөнү-сырдыгы оҥоруох баҕаҥ күүһүрэр.
«Мин, Хаптаҕай олохтооҕо, кыыспыт Евдокия Римовна туһунан кэпсиэхпин баҕардым. Биир дойдулаахпыт көмөтө, туһата үгүс. Ол курдук, 2015 сыллаахха ахсынньы 12 күнүгэр куораттан мелодистары таһааран, кэнсиэр көрдөрбүтэ. 2014 -2019 сылларга элбэх киһини «Хоту» профилакторийга сынньаппыта. 2020 сылы көрсө 35 оҕоҕо Саҥа дьыллааҕы минньигэс бэлэҕи оҥорбута. Кыайыы 75 сылыгар анаан нэһилиэк кырдьаҕастарыгар уон күн устата массаас оҥорбута. «Лотос» чааһынай килииникэҕэ биир дойдулаахтарын УЗИ-га ыҥыран бэрэбиэркэлэппитэ. 2021 сыллаахха олунньу 23 күнүгэр соҕотох аҕаларга «Үтүө санаа аахсыйатын» ыытан, 10 киһиэхэ бэлэх уунна. Эйэҕэс санаалаах кыыспытыгар махтанан туран, кэлэн иһэр Дьахтар күнүнэн эҕэрдэлиибин! Кини дьиэ кэргэнигэр байылыат олоҕу, этэҥҥэ буолууну баҕарабын» диэн бэртээхэй ис хоһоонноох суруйууну батсаапка ааҕан баран, кинини үчүгэйдик билэр буолан, Евдокия Поповаҕа эрийэн, «хаһан? хайдах? тоҕо?» диэн туоһуластым.
Онуоха Евдокия Римовна маннык хоруйдаата:
— Мин 2015 сылтан дьоҥҥо бэйэм тус санаабынан баар кыахпын туһанан, өйөбүл оҥорорго санаммытым. Биһиги аттыбытыгар элбэх оҕолоох биир дойдулаахтарбыт, соҕотох аҕалар, ийэлэр үгүстэр. Тоҕо сатамматый Саҥа дьыллааҕы бэлэҕинэн кинилэр санааларын көтөҕөр? Ааспыт сылга Улуу Кыайыы 75 сылын үөрүүлээхтик бэлиэтээтибит. Онно нэһилиэгим 22 бэтэрээнин массаастаатым. 25 сыл устата эмчитинэн үлэлээбит буолан, кырдьаҕастар да, ыраах хоту улуустартан да, УЗИ-га, МРТ-га кэлэн уочараттаан олорор дьону наһаа аһына көрөөччүбүн. Онон кыһалҕалаах дьоҥҥо УЗИ, МРТ, массаас курдук өҥөлөрүнэн туһанарга көмөлөһөбүн. Ийэм Мотрена Гаврильева- Кычкина хос аата «Добрай Мотя» диэн этэ. Кинини батан, наар дьоҥҥо үтүөнү оҥоруохпун баҕарабын.
Үтүө санаатыттан дьоҥҥо буор босхо көмөлөһө сылдьар доруобуйа харыстабылын туйгуна, Мэҥэ Хаҥалас улууһун Хаптаҕай нэһилиэгин Бочуоттаах олохтооҕо Евдокия Попова курдук үтүөнү уонна сырдыгы саҕар дьонноох буолан, саха норуота сайдар, үүнэр кэскиллээх.
«Үтүө дьыала өрүү батыһыннарылаах» дииллэр. Евдокия Попова холобурун батыһааччылар үксүү турдуннар!
Елена ПОТОЦКАЯ, “Саха сирэ” хаһыат, edersaas.ru
Хаартыска — Евдокия Попова дьиэтээҕи архыыбыттан.