Үтүөлээх юрист Николай Каратаев төрөөбүтэ 85 сылын өрөспүүбүлүкэ таһымыгар бэлиэтиири туруорустулар
Ааспыт нэдиэлэҕэ Дьокуускай куоракка ХИФУ кылаабынай куорпуһугар өрөспүүбүлүкэ биллэр-көстөр судаарыстыбаннай-уопсастыбаннай деятелэ, юстиция үс кылаастаах судаарыстыбаннай сүбэһитэ, РФ уонна СӨ үтүөлээх юриһа Николай Каратаев төрөөбүтэ 85 сыллаах үбүлүөйүн суут уонна прокуратура бэтэрээннэрэ, төрөөбүт Тааһаҕарыттан анал дэлэгээссийэ, Бүлүү улууһун баһылыга Сергей Винокуров, чугас аймахтара, табаарыстара кыттыылаах «Ахтан санаан ааһыаҕыҥ, ааттаах-суоллаах киһини — аҕа табаарыспытын Каратаев Николай Нифонтовиһы!» диэн тэрээһин буолан ааста.
Александр ТАРАСОВ, «Саха сирэ» хаһыат, https://edersaas.ru
Тэрээһиҥҥэ Николай Нифонтович олоҕор аналлаах хаартысканан быыстапка туруорулунна, видео-устуулар көрдөрүлүннүлэр.
Кэлбит дьон Николай Каратаев туһунан истиҥ-иһирэх тыллары эттилэр. Кини үлэтинэн киэн тутталларын, өрүү мэлдьи ахта-саныы сылдьалларын туһунан кэпсээтилэр.
Семен Васильев, Бүлүү улууһун Тааһаҕар орто оскуолатын дириэктэрэ:
– Бэрт истиҥ көрсүһүү буолла. Тэрээһин резолюциятыгар Николай Нифонтович өрөспүүбүлүкэ сайдыытыгар элбэх үтүөтүн учуоттаан, төрөөбүтэ 85 сылын үрдүк таһымнаахтык бэлиэтииргэ анал хамыыһыйаны тэрийэргэ СӨ бырабыыталастыбатыгар көрдөһүү суругу ыытарга быһаардыбыт. Иккиһинэн, Бүлүү улууһун бүддьүөтүттэн көрүллүбүт сүүс миэстэлээх оскуола тутуута түргэтииригэр СӨ бырабыыталыстыбатын көмөтө эрэйиллэрэ этилиннэ. Николай Каратаев аатынан оскуола 2009 сылтан саахалланар туруктаахтарга киирэн сабыллан, билигин оҕолор хас эмэ сиринэн тарҕанан үөрэнэ сылдьаллара олус хомолтолоох.
Александр ТАРАСОВ, «Саха сирэ» хаһыат, https://edersaas.ru