В.П.Керемясов аатынан Дьокуускайдааҕы 3 №-дээх спортивнай оскуола тустуунан дьарыктаныы бастакы түһүмэҕин туһунан кинигэни бэлэмнээн таһаарда. Омос көрдөххө, төһө да дьоҕус буолбутун үрдүнэн, научнай хабааннаах үлэ эбит. Санатан эттэххэ, бу үөрэх кыһата маннык хабааннаах номнуо төрдүс кинигэтэ.
Кинигэ, Саха Өрөспүүбүлүкэтин үтүөлээх тренерэ Иннокентий Семенович Кочкин 40 сыллаах үлэтигэр анаммыт научнай-практическай конференция матырыйаалларыттан түмүллэн оҥоһуллубут. Бу кинигэ научнай консультаннарынан педагогическай наука доктора Николай Дмитриевич Неустроев уонна педагогическай наука хандьыдаата Владимир Гаврильевич Торговкин буолбуттар. Кинигэ ис хоһоонугар аҥардас тустуу техникатын уонна тактикатын эрэ туһунан буолбакка, эдэр бөҕөстөрү бэлэмнээһин систиэмэтин боппуруостара арыллан көрдөрүллэллэр. Холобур, дьарык уонна күрэхтэһии кэмигэр өйү-санааны, хараахтары бэлэмнээһин, иитии киэҥник сырдатыллыбыт.
Саҥа кинигэни сүрэхтээһиҥҥэ 15 сыл иһигэр уонунан ааҕыллар Россия, Европа, аан дойду күрэхтэһиилэрин кыайыылаахтарын уонна призердарын бэлэмнээн таһаарбыт Дьокуускай куорат 3 №-дээх спортивнай оскуолатын тренердэрэ кытыннылар. Ону тэҥэ, Иннокентий Семеновиһы эҕэрдэлии кини доҕотторо уонна биир идэлээхтэрэ муһуннулар.
Маннык туһалаах литература тахсыытын биһирээн СӨ уолаттарга хамаандатын кылаабынай тренерэ Прокопий Иванов, учуонайдар Николай Неустроев, Владимир Торговкин, элбэх кинигэ ааптара, Россия чөмпүйүөнэ Петр Попов¸ кинигэҕэ киирбит матырыйааллар ааптардара Гаврил Дмитриев (Хаҥалас), Кирилл Павлов (Амма), спорт бэтэрээннэрэ Владимир Данилов – Бэһиэлэйдээх Болуодьа, эстрада ырыаһыта Владимир Татаринов, “Саха” НКИХ режиссера Лена Керемясова санааларын үллэһиннилэр.
Владислав КОРОТОВ.