Биһиги, Одуну нэһилиэгин «Айтал» түөлбэтин олохтоохторо, 2018 сыл от ыйын 31 күнүгэр ТОС «Айтал» регистрациятын ааһан, улуус, өрөспүүбүлүкэ таһымнаах араас бырайыактарга кыттар кыахтаммыппыт.
edersaas.ru
Ол курдук, 2019 сылга улуус иһинэн субсидия ылар ТОС-тар күрэхтэһиилэригэр бырайыакпытын ситиһиилээхтик көмүскээн, 380 тыһыынча солкуобай суумалаах Граны ылары ситистибит.
Түөлбэ олохтоохторо сүбэлэһэн, кэпсэтэн, былааннаан баран, биир санаанан оҕо, төрөппүт сынньанар былаһааккатын тутарга быһаардыбыт. Бастатан туран, былаһааккабыт турар сирин ыраастааһыҥҥа түөлбэ олохтоохторугар субуотунньук тэрилиннэ.
Манна улаханныын-кыралыын тахсан, бары үөрэ-көтө кытыннылар. Көхтөөх аҕаларбыт, эһээлэрбит уус илиилэринэн былаһааккабыт олбуорун тутан биэрдилэр.
Ийэлэрбит көмөлөрүнэн олбуорбут араас өҥүнэн киэркэйэ тубуста. Сибэкки арааһын, мас олордон, былаһааккабытын ситэрэн биэрдибит.
Эдэр аҕаларбыт Петр Павлов, Эдуард Данилов дьэрэкээн кэрэ бэйэлээх сынньанар бэсиэккэни уонна ыскамыайкалары тутан, оҕолору үөртүлэр. Куораттан оҕо оонньуур тимир тэриллэрин: хаачыаллары, гуоркалары, песочницаны тиэйтэрэн аҕалан туруордубут.
Маны таһынан, былаһааккабыт аттыгар сайыҥҥы тэпилииссэни, оҕуруот кирээккэлэрин Николай Филиппов, Моисей Николаев туттулар.
Түөлбэбит иһинэн онус сылын тэриллибит «Дружная семейка» дьиэ-кэргэн лааҕырын оҕолоро сайын устата оҕуруот аһын, сибэккилэри үүннэрэн, бүөбэйдээн көрдүлэр. Кинилэр түөлбэ олохтоохторун, тыыл, үлэ бэтэрээннэрин, элбэх оҕолоох дьиэ-кэргэттэри сибиэһэй оҕуруот аһынан күндүлээтилэр.
Ити курдук, түөлбэбитигэр оҕо былаһааккатын тэрийэммит, түөлбэ оҕолоро сайыҥҥы сынньалаҥнарын туһалаахтык атаардылар, төрөппүттэр сынньанар сирдээх буолан, махталлара баһаам.
Түөлбэбит үлэтигэр, олоҕор сыл аайы саҥаттан саҥа сүүрээн киирэн иһэриттэн биһиги астынабыт уонна үөрэбит.
Жоржетта ТЕКЕЯНОВА,
«Айтал» түөлбэ салайааччыта.
Горнай улууһа.