Мэҥэ Хаҥалас улууһун А.С. Шахурдин аатынан Төҥүлү орто оскуолатын тохсус кылааһын үөрэнээччитэ Валерия Матросова Бүтүн Арассыыйатааҕы нуучча литературатын олимпиадаларыгар призер буолла.
edersaas.ru саайт Валерия учууталыгар Маргарита Иннокентьевна Киренскаяҕа сибээскэ таҕыста:
— Дойду бастыҥ үөрэнээччилэрэ Крым тумул арыытыгар баар «Артек» Бүтүн Арассыыйатааҕы киинигэр муһуннулар. Валерия Саха сириттэн соҕотох кытынна. Алта күн устата үс түһүмэхтээх тургутууну ааста. Биһиги литература олимпиадатыгар кыттыбыт буоламмыт, бастакы түһүмэххэ айымньы анаалыһа этэ. Иккис — айар түһүмэх уонна үһүс — тылынан саҥа.
Коронавируһунан сибээстээн, оҕолору “Артек” лааҕырга түһэрбит буоллахтарына, учууталлары 20 км ыраах олортулар. Оҕолорбутун чаас аҥаара олимпиада эрэ иннинэ көрсүһүннэрэллэр.
Бэлэммит бэрткэ ааспыта. Биһиги дьарыкпыт таһынан, өрөспүүбүлүкэҕэ бастаабыт оҕолору мунньан «Сириус» диэн кууруска бэлэмнээбиттэрэ. Ону таһынан, Наука кыра академията эмиэ дьарыктаабыта. Түгэнинэн туһанан, кинилэргэ махталбытын тиэрдэбит.
Валерия миэхэ сэттис кылаастан үөрэнэр. Бэйэтэ наһаа эппиэтинэстээх, кыһамньылаах, дьаныһан туран ааҕар үөрэнээччи. Былырыын ахсыс кылааска үөрэнэ сылдьан, баала хапсан, тохсус кылаастар олимпиадаларыгар кыттыбыта уонна өрөспүүбүлүкэҕэ бастаабыта. Быйыл Өрөспүүбүлүкэтээҕи лицей-интернакка туттарсан киирдэ, – диэн Валерия учуутала Маргарита Иннокентьевна кэпсээтэ.
Виктория Бястинова, edersaas.ru саайт, «Саха сирэ» хаһыат.
Хаартысканы Маргарита Киренская ыытта.