Төлөпүөнү туора киһиэхэ уларсар сэрэхтээҕин, баҕар, сорохтор сэрэйбэттэрэ буолуо. Үтүө санаалаах, аһыныгас киһи үгүстүк масыанньыктар илиилэригэр киирэн биэрэрэ баар суол. Биир оннук түбэлтэ туһунан чааһынай гостиница үлэһитэ Наталья Ивановна (аатын уларыттым) бу курдук кэпсээтэ:
— Саҥа дьыл бырааһынньыгар кыра оҕолоох кыыһым күүлэйдии кэлбитэ. Дьиэтигэр төннөрүгэр төлөпүөммүнэн такси сакаастаатым. Арай туран, такси сулууспата миэхэ: “Эн төлүүр иэстээххин. Айаннаан баран бачча сууманы төлөөбөтөҕүҥ”, — диэн иһитиннэрии ыытта. Хайыахпыный, иэспин төлөөн, кыыһым ааҕы ыыттым. Дьэ, уонна толкуй бөҕөҕө түстүм. Арбыы-арба, бу алтынньы ыйга этэ. Гостиницаҕа дьуһуурустубабар кэллим. Арай орто саастаах саха дьахтара кэпсии-ипсии аҕай турар. Бөөлүүн манна хоммут. “Такси сакаастаан барыам этэ, төлөпүөҥҥүн уларыс”, — диэбитигэр хап-сабар ылан биэрээччи буоллум. Ити итинэн хааллаҕа дии. Ол иһин сирэйэ-хараҕа хайдах эрэ этэ. Билигин санаатахпына. Ол таксист барахсаҥҥа харчыбын ыла киирдим диэн баран тахсыбатах үһү. Ону уопсай дьиэттэн хантан булан ылыаҕай? Кэтэһэ сатаан баран бардаҕа дии.
Дьэ, буолар да эбит! Киһи арааска барыта түбэһиэн сөп. Онон төлөпүөҥҥүтүн билбэт, туора киһигитигэр уларсымаҥ.
Женни СТРЮКОВА, “Саха сирэ” хаһыат, http://edersaas./ru