Уопсастыба

Төлөйгө муҥхалаан бүттүлэр

Өрөбүл күн Чурапчы улууһун Төлөй нэһилиэгин олохтоохтохторо муҥха сезонун сабыы тэрээһини ытык Эбэҕэ тэрийэн ыыттылар. 

Бу туһунан нэһилиэк баһылыга Игорь Николаев маннык  кэпсээтэ:

Муҥха сезонун сабар тэрээһини ыытыыга нэһилиэкпит энтузиаст-уопсастыбанньыга Афанасий  Дьячковскай тыл көтөҕөн тэрийдибит.

Барыта үс муҥха түстэ. Хаһаайыттар Дмитрий Смирников,  Егор Максимов, Чурапчыттан — Иван Лаврентьев. Тэрээһиҥҥэ элбэх оҕо кыттыбыта үөртэ.

Кинилэргэ анаан кууллаах хаары сүгэн сыыры өрө сүүрэн тахсыы, тоҥ хаарынан сүүрүү, балыгы кууллааһын  күрэхтэһиилэрин ыыттыбыт.

  Эр дьон ойбон алларыытыгар, хамаанданан ханаат тардыһыытыгар, кэрэ аҥардарбыт балык былдьаһыытыгар күрэхтэстилэр.

Бары кэлбит ыалдьыттары сылаас балык миининэн күндүлээтибит.

Нэһилиэкпит киэн туттар булчуттарын ааттарын үйэтитэр инниттэн  күрэхтэһиилэргэ бириистэри  оҕолоро уонна кинилэр сиэннэрэ туруордулар. Ол курдук, 
спонсордарынан булчуттар Егор Максимов, Семен Максимов, Николай Аммосов,    Егор Попов, Василий Смирников, Михаил Толстоухов, Василий Коркин оҕолоро уонна сиэннэрэ, ону тэҥэ олохтоох дьаһалта буоллулар.

Бу нэһилиэк эмэн уонна эдэр дьону биир сомоҕолуур тэрээһини бу курдук сыл аайы  тэрээһиннээхтик ыытан, үгэскэ кубулутан, салгыы сайыннара турар баҕалаахпыт.

Елена ПОТОЦКАЯ, “Саха сирэ” хаһыат, edersaas.ru

1
0