Соторутааҕыта Чурапчы улууһун Төлөй нэһилиэгин дьаһалтатын хонтуората умайан хаалбыта.
Бу күннэргэ олохтоох дьаһалта салалтата докумуоннары чөлүгэр түһэриигэ үлэлиир. Баһылык Игорь Николаев:
— Хонтуора умайар түүнүгэр наһаа күүстээх тыал туран, электричество эргэ лиинийэтиттэн уот турбута. Тыа сирин олохтоох дьаһалталарын дьиэтэ үксэ эргэ тутуулар. Хаһан баҕарар араас төрүөттэн баһаар барар куттала баар. Онон дьаһалталар салалталара, бастатан туран, улуустааҕы архыыпка дьыаланы кэмигэр тутттаран иһэллэригэр сүбэлиибин.
Бу күннэртэн саҕалаан, Саҥа дьыллааҕы өрөбүллэргэ диэри биһиги интэриниэттэн туһааннаах докумуоннарбытын чөлүгэр түһэрэ сылдьабыт. Онуоха кэллиэгэлэрбит, улуус нэһилиэктэрин дьыаларларыгар эппиэттээх исписэлиистэр көмө буолаллар. Истиҥ махтал кинилэргэ.
Бэҕэһээ, сэтинньи 25 күнүгэр, умайбыт хонтуора оннун ыраастааһыҥҥа субуотунньук тэрийдибит. Шефтээх тэрилтэбит — Чурапчытааҕы аграрнай-техническэй кэллиэс үлэһиттэрэ (дириэктэр Василий Гуляев) уонна нэһилиэкпит эр дьоно сарсыардаттан хойукка диэри тэтимнээхтик үлэлээтилэр.
Хонтуора умайбыт истиэнэлэрин, бөҕү-сыыһы хомуйууга субуотунньукка кыттыбыт, күүс-көмө, өйөбүл буолбут нэһилиэкпит эр хоһууттарыгар уонна Василий Гуляев салайар Чурапчытааҕы аграрнай-техническэй кэллиэс үлэһиттэригэр нэһилиэк олохтоохторун аатыттан барҕа махталбытын тиэрдэбит, —— диэн иһитиннэрдэ.
Елена ПОТОЦКАЯ, «Саха сирэ» хаһыат.