Олунньу 8 күнүгэр А.Пушкин аатынан Национальнай бибилэтиэкэ историческай саалатыгар 4 кинигэ ааптара, прозаик, Арассыыйа Суруйааччыларын чилиэнэ Валерий Никифоров-Суор Уола «Бичик» Национальнай кинигэ кыһатыгар 4 тыһыынча ахсаанынан тахсыбыт «Түүҥҥү Куо» хомуурунньугун сүрэхтэниитэ буолла.
Сааланы ыы-быччары толору киһи мустубута долгутта, үөртэ. Сүрэхтэниини «Айар кут» түмсүү ааптардара Светлана Самсонова-Сиибиктэ, Валентина Пинигина-Арылы салайан ыыттылар. Боччумнаах тыл этии, айымньыны ырытыһыы, санааны атастаһыы буолла. ХИФУ профессора, философскай наука доктора Виктор Михайлов, ХИФУ математикаҕа институтун доцена Марк Григорьев,«Көмүөл» кинигэ кыһатын эрэдээктэрэ Борис Павлов, «Бичик» Национальнай кинигэ кыһатын салайааччыта Август Егоров, Арассыыйа Суруйааччыларын сойууһун чилиэнэ, бэйиэт Анатолий Старостин-Сиэн Кынат кыттыыны ыллылар, ыллыктаах ыйыы-кэрдии, сүбэ-ама биэрдилэр. Суруйааччылар Михаил Иванов-Чуона Мэхээлэ, Александр Постников-Сындыыс, Василий Гоголев-Уйулҕан, Иван Попов-Уһук Уйбаан, Александр Дунаев, Егор Фёдоров-Долун, Оксана Гаврильева-Айсаана кэлэн биһирэми сэргэхситтилэр. Намтан «Отуу уоттара», «Уран тыл» (Таатта), «Хоһоон хонуута» (сал. Парасковья Стручкова-Саһарҕа), «Өлүөнэ долгуннара» (Хаҥалас), «Уһуктуу» (Уус-Алдан) литэрэтииринэй түмсүүлэр, «Айар куттан» 2 түмсүү, бииргэ үөрэммит доҕотторо уо.д.а. эҕэрдэлэрин тиэртилэр.
Ырыа-тойук ылланна, анабыл хоһооннор ааҕылыннылар. «Түүҥҥү Куо» кинигэ тула ирэ-хоро, истиҥ санааларын үллэһиннилэр, ырыттылар. Ырыаһыттар Константин Мохначевскай, Валентина Саввина-Оһуордаах, Эльвира Семёнова-Тускулаана, Петр Кычкин-Сайылык Бүөтүрэ күндү көмүс куоластарынан кэрэмэн кэрэҕэ, сыдьаайар сырдыкка, үрдүккэ көтүтэн, үтүөнү түстээн дьон-сэргэ сүргэтин көтөхтүлэр. Суруйааччы кэпсээннэринэн «Айар кут» литературнай-музыкальнай композиция кэрэхсэттэ.
Валерий Никифоров-Суор Уолун айымньыларын ааҕааччы сөбүлээн ааҕарын, сэргиирин бу дьоһун биһирэм өссө төгүл итэҕэттэ. Суруйааччы инникитин, сытыы бөрүөтэ сыппаабакка, айа-тута, суруйа-бичийэ сылдьарыгар, үүнэ-сайда, үөһэ дабайа турарыгар баҕа санаа бастыҥа этилиннэ.
Светлана САМСОНОВА, “Саха сирэ” хаһыат, edersaas.ru