Биһиги Бүлүү куорат олохтооҕун, норуот маастарын, өрөспүүбүлүкэҕэ бастакынан хомуһу оҥорор оскуоланы тэрийбит, алгысчыт, САССР култууратын үтүөлээх үлэһитэ, бочуоттаах олохтооҕо, удьуор уус тарбахтаах ытык киһибит Иван Федорович Захаров – Кылыадьы уус төрөөбүтэ 100 сылынан, кини аатын сүгэр түмэл дьиэтигэр астыктык бэлиэтээбиппит.
Маннык киэҥ тэрээһини музей сэбиэдиссэйэ Сардаана Сыроватская сүүрэн-көтөн, түбүгүрэн-садьыгыран, улаханнык долгуйан, үрдүк эппиэтинэһи ылынан үрдүк таһымнаахтык оҥорбутугар махтанабыт. Кини 1986 с. Бүлүүтээҕи Г.И. Чиряев аатынан оскуоланы бүтэрэн, Дьокуускайга иис үөрэҕэр үөрэнэн, үс ый “Сардаана” фабрикаҕа үлэлээбитэ. Онтон СГУ култуура уонна философия факультетыгар үөрэнэн баран, үлэтин музейдартан саҕалаабыта. Билигин бу И.Ф.Захаров аатынан түмэлгэ сэбиэдиссэйинэн үлэлии олорор.
Захаров И.Ф. –Кылыадьы уус төрөөбүтэ 100 сылын бэлиэтиир тэрээһиҥҥэ, ыраахтан чугастан ыҥырыылаах ыалдьыттар хотоҕостуу мустубуттара көрүөхтэн астык буолбута. Оннооҕор биһиги, 70-80 саастарын ааспыт эбээлэр ыҥырылламмыт, өйбүт ырааһыран, араахымабыт тупса сылдьабыт. Биһиги, эбээлэр, 2015 сылтан “Ыллык” диэн түмсүүлээхпит. Ыччаты кэрэҕэ, сырдыкка угуйабыт. Салайааччыбыт СӨ култууратын туйгуна Владимир Спиридонович Николаев аал уоту оттон, тэрээһиҥҥэ кэлбит ыалдьыттары алгыстаатыбыт, арчылаатыбыт. Манна үгүс киһи муһунна. Олор ортолоругар хомус уустара Р.Г.Чемчоев, П.Ф.Осипов, С.С.Васильев, И.Т.Павлов, М.Н.Мальцев, уо.д.а. бааллар. Ыалдьыттарынан бэйэбит кыыспыт, Аан дойдуга улахан түһүлгэлэргэ ыҥырыллан оонньуур виртуоз-хомусчут, СӨ култууратын үтүөлээх артыыһа, Бүлүү улууһун бочуоттаах олохтооҕо Альбина Дегтярова, Чехияттан ыалдьыт, хомусчут Петр Ясинчук, хомус Аан дойдутааҕы киинин уонна түмэлин учуонай сэкирэтээрэ Эркин Алексеев, хомус Аан дойдутааҕы киинин уонна түмэлин дириэктэрэ Дмитрий Бэстиинэп, дириэктэри солбуйааччы Николай Ефремов, СӨ тимир уустарын Ассоциациятын бэрэсидьиэнэ Николай Бурцев, уо.д.а. буоллулар.
Дьоро күн И.Ф. Захаров туһунан элбэх хайҕал тыллар этилиннилэр. Хомус Аан дойдутааҕы түмэлиттэн ураты, уран оҥоһуулаах Кылыадьы уус хомустара аҕалыллан, бар дьон көрүүтүгэр быыстапкаҕа туруорулуннулар.
Күүтүүлээх күндү тэрээһиҥҥэ Альбина Дегтярова Бүлүүгэ Г.И.Чиряев аатынан оскуолаҕа СӨ үтүөлээх, РФ үөрэҕириитин туйгуна П.Д.Ивановаҕа үөрэммитин киэн туттан истиҥник аҕынна. Кини дьүрүһүйэр хомуска, сөрүүн сүөгэй курдук сүрэҕи-быары ортотунан киирэр саха тылыгар оҕолору уһуйбут учууталыгар ис сүрэҕиттэн улаханнык долгуйан туран махтанна. Үөрэппит оҕото учууталыгар махтала олус долгутуулаах, үөрүүлээх буолла. Онтон Павлина Даниловна хомустаах оҕолору түмэн, төрөппүттэри кытта сахалыы таҥас тигэн, оччолорго үөрэхтээһин сыла бэлиэтэниитинэн улахан кэнсиэри оҥорбуттарын, ол түмүгэр лауреат үрдүк аатын ылбыттарын үөрэн-көтөн туран аҕынна. Павлина Даниловна үөрэнээччитигэр бэйэтэ оҥорбут “Сиэп ымыыта” диэн ааттаах кыра кээмэйдээх кумааҕы планшеты туттарда, истиҥ баҕа санаатын эттэ. Бу кумааҕы планшекка “Ыллык” түмсүүлэр тугу үлэлээбиттэрэ, быһаарыылаах хаартыскалардааҕа ыалдьыкка күндү бэлэх буолла. Салгыы А.Дегтярева аҕатын, учуутал М.Е.Иванов туһунан таһаартарбыт кинигэтин олохтоох түмэл сэбиэдиссэйигэр Сардаана Сыроватскаяҕа дохсун ытыс тыаһыгар доҕуһуоллатан туттарда. Бу кинигэ түмэл бибилэтиэкэтигэр күндү бэлэх быһыытынан ууруллуоҕа.
«Ыллыктар» бэртээхэй тэрээһиҥҥэ сылдьан күүс-уох ыллыбыт, сэниэ-оноо эбиннибит. Итиэннэ биһиги ортобутугар Иван Федорович Захаров курдук ытык мааны хомус охсооччу төрөөн, олорон, үлэлээн ааспытын, үтүө киһи аата уостубатын курдук, кэрэ бэлиэ кэрэһит күнү олус үчүгэйдик тэрийбиттэригэр махтанабыт. Тапталлаах биэс оҕо, күндү-мааны икки сиэн саамай чугас киһилэригэр, иһирэх ийэлэригэр, эйэҕэс эбээлэригэр Сардаана Сыроватскаяҕа үйэлээх тэрээһини оҥорбутугар барҕа баһыыбабытын тиэрдэбит.
Ыарыы, тумуу тумуннун! Доруобай буолуоҕуҥ! Үөрэ-көтө сылдьыаҕыҥ!
«Саха сирэ хаһыат, edersaas.ru саайтка анаан “Ыллык” түмсүү чилиэттэрэ.
Бүлүү