Түөкүттэр маннык ньыманан албынныыллар:
1.Түөкүн бэйэтин билиһиннэрэр.
2.Түөкүн албаһыгар киллэрэ сатыыр киһитин персональнай дааннайын этэр.
3.Албаһы туһанан, эмсэҕэлээччи счетун туһунан муннарыылаах саарбах историяны айан кэпсиир.
4.Албыннааччылар сымыйанан Киин баан, Силиэстийэлиир управление, полиция, бааннарга куттал суох буолуутун хааччыйар сулууспа, ФСБ, о.д.а. үлэһиттэрэ аатыраллар.
5.Угаайытыгар киллэрэ сатаан, бу киһи харчытын «аптаах» куттала суох счекка (түөкүттэр тус счеттарыгар) көһөрөргө сүбэлиир.
6.Оттон угаайыга киирэн биэрбит киһи, түөкүттэргэ бэйэтин харчытын бэйэтин баҕатынан ыытар, эбэтэр кирэдьиит ылан ыыппыт буоллаҕына, онтун төлүүрүгэр тиийэр.
Бу сырыыга түөкүн «Москваттан силиэдэбэтэл Ольшевскай Евгений Витальевич» диэн ааттаммыт. Дьахтар персональнай дааннайын, счетугар ууруулаах харчытын барытын эппит уонна «ВТБ» Москватааҕы офиһыгар бу дьахтар аатыттан генеральнай дэбиэриннэстээх аймаҕа аатыран (племянник ) биир киһи дьахтар счетуттан уурдарыытын устуон баҕарбытын, онон түөкүннээччигэ сыһыаннаах холуобунай дьыаланы силиэстийэлиирин кэпсээбит. «Силиэдэбэтэл» дьахтар харчытын куттала суох сиргэ уурдарарыгар дьаныһан туран сүбэлээбит.
Дьахтар быһаарыыны бэйэтэ ылынартан туттунан, кэргэнин кэтэспит. Онуоха быһыыны-майгыны күүркэтэн, түөкүттэр » ИДьМ ОСБ сотруднигын Рогочковы» кыттыһыннарбыттар. Ол кэнниттэн ханнык эрэ Крыловаттан төлөпүөн кэлбит. Кини этиитинэн кэргэнниилэр иккиэн «Сбербаан» офиһыгар тиийбиттэр. Онно тиийэн ыйыы-кэрдии быһыытынан аан бастаан баан үлэһиттэрэ дьиэлэригэр баралларын кэтэспиттэр, онтон салгыы хонугу эргиччи үлэлиир банкомаакка тиийэн «куттала суох счекка» харчыларын ыыппытынан барбыттар. Ол курдук, уон биэстии тыһыынчанан түүнү быһа ыыппыттар. Ол быыһыгар Крылованы кытта ыытар харчыларын сууматыттан сылтаан иирсибиттэр. Онуоха түөкүттэр бу дьон силиэстийэҕэ туорайдаһалларын иһин, кинилэргэ холуобунай дьыаланы тэрийиэх буолан куттаабыттар.
Сарсыарда 5 чаас саҕана банкомат харчыны ылбат уонна ыыппат буолбут. Онуоха Крылова хаалбыт сууманы сарсын ыыталларыгар сүбэлээн бу дьону уоскуппут. Кэргэнниилэр кини «сүбэтин» ылынан, эмиэ иккис күн түүнүгэр харчыларын салгыы ыыппыттар.
Түмүккэ, дьахтар түөкүттэртэн харчытын ыыппытын туһунан квитанцияны уонна түөкүттэр сиэртибэлэрэ буолбутун туһунан ыспыраапканы туппут. Итиэннэ өйдөөбөккө түөкүттэри кытары салгыы кэпсэппиттэр. Бу сырыыга түөкүттэр сөбүлэҥ бэриллибит кирэдьиитин быыһыырга, аны, ипотекаҕа кирэдьиит ыларга эппиттэр. Бу кэнниттэн эмсэҕэлээччилэр туохха киирэн биэрбиттэрин өйдөөбүттэр.