Саха сирин үс олохтооҕо түөкүттэр угаайыларыгар киирэн биэрэн, уопсайа мөлүйүөнтэн тахса суумаларыттан мэлийбиттэр.
Ыраахтан олорон албыннааччылар араас албастарыгар дьон киирэн биэрэр диэн СӨ ИДьМ саайтыгар суруйаллар.
Ленскэй оройуонугар олорор 35 саастаах инженери түөкүттэр баан үлэһиттэрэбит диэн албыннаабыттар. Киниэхэ «Хоум Кредит» баан үлэһитэбин диэн дьахтар эрийбит уонна бу киһи аатыттан кирэдьиит ыларга онлайн-сайаапка киирбитин иһитиннэрбит. Онуоха бу киһи ханнык да сайаапка биэрбэтэҕин эппитигэр, албыннааччы түөкүттэр кини аатыттан кирэдьиит ылбаттарн курдук, дуогабары көтүрэргэ уонна ону дааннайдар баазаларыттан сотторорго бары СМС кодун этэн биэрэригэр «сүбэлээбит».
Баан сымыйа үлэһитэ бу инженергэ төлөпүөнүн араарбатыгар уонна фоновай эрэсииминэн кэпсэтиини салгыырга эппит. Чаас аҥарынан сибээс быстыбытыгар, дьахтар тута төлөпүөннээн коду салгыы ылбыт. Онтон бу киһи кини аатыттан ылаары гыммыт кирэдьииттэрэ көтүллүбүтүн билээри, киэһээ баан «суһал линиятыгар» төлөпүөннээбит. Онуоха иэс ылыллыбыт харчы «тус кабинет» көмөтүнэн араас счеттарга ыытыллыбытын эппиттэр. Түөкүттэр ити курдук бу киһиттэн 998 000 солк. сойбоппуттар.
54 саастаах Нерюнгри оройуонун олохтооҕо сайын бэс ыйыгар интэриниэккэ массыына көбүөрдэрин атыылыыр саайты булбут. Менеджери кытары быһаарсан, кэпсэтэн баран, 10 900 солк. ыыппыт. Менеджер хардатын бу киһи табаарын 2-3 нэдиэлэнэн тутуоҕар эрэннэрбит. Уһаан-тэнийэн барбытыгар, маҕаһыын бэрэстэбиитэллэрэ ыытарга кыратык тардыллыы тахсыбытын эппиттэр. Кэлин төрүт да төлөпүөҥҥэ хоруйдаабат да буолбуттар. Албыҥҥа киирэн биэрбит сакаастаах киһи полицияҕа биллэрбит.
Алдаҥҥа 59 саастаах пенсионер интэриниэккэ атырдьах ыйыгар брокерскай хампаанньа саайтын булан сэҥээрбит. Сотору кэминэн киниэхэ «менеджер по инвестициям» төлөпүөннээбит уонна эбии харчылаһарга этии киллэрбит. «Сымыйа брокердар» ыйыыларынан кини «Totalcoin» сыһыарыыны туруоруммут, онно регистрацияламмыт уонна 12 000 солкуобайы бастакы усунуос быһытынан ыыппыт. Салгыы «Александр» диэн менеджер бу киһиэхэ өссө обургу сууманы ыытарыгар, оччотугар дохуота улахан буолуоҕун эппит. Онуоха бу киһи төлөпүөн ыйыллыбыт нүөмэрдэригэр 98 000 солк. уонна 38 000 солк. ыыталаабыт. Оттон «сымыйа брокердар» аны уурдарыы сууматын 500 тыһ. солк. диэри улаатыннарарын ирдээн уонна кирэдьиит ыларыгар «сүбэлээн» барбыттар. Онуоха пенсионер аккаастаммыт уонна харчытын төттөрү ыла сатаабыт да табыллыбатах. «Менеджердэри» да кытары кэпсэтэ сатаабыта кыаллыбатах. Онон бу киһи 148 000 солк. мэлийбит.
«Саха сирин ытыктабыллаах олохтоохторо! Сэрэхтээх буолуҥ! Атыылаһар-тутуулаһар буоллаххытына официальнай интернет-маҕаһыыннартан эрэ ылыҥ. Билбэт дьоҥҥутуттан сэрэниҥ. Өйдөөҥ, ыраахтан олорон албынныыр түөкүттэр ханнык баҕарар тэрилтэ үлэһитэ буолбута буолан кубулунуохтарын сөп. «Баан куттал суох буолуутун үлэһиттэрин» кытта кэпсэтэ сатаамаҥ. Түргэнник байар туһунан иһитиннэриигэ итэҕэйимэҥ. Билбэт киһигит ыйыытынан-кэрдиитинэн харчыгытын онно-манна ыытымаҥ. Билбэт сыһыарыыларгытын төлөпүөҥҥүтүгэр да, компьютергытыгар да киллэримэҥ. Харчыгытын билбэт дьоҥҥутугар ыытымаҥ», — диэн СӨ ИДьМ пресс-сулууспата өйдөтөр, сэрэтэр.
+1
+1
+1
+1
+1
+1
+1