Түөкүттэр дьонтон харчыларын уоран ылар сыаллаах араас ньыманы толкуйдууллар. Бастаан баан үлэһитин аатыттан төлөпүөннээн, счеккутуттан харчыгытын устубуттар, биитэр туох эрэ атын кыһалҕа үөскээтэ дииллэр. Ол кэнниттэн, каарталаах хаһаайын итэҕэйэрин курдук, полиция үлэһитэбит диэн эрийэр буоллулар.
Бу аҕыйах хонуктааҕыта Дьокуускай куорат олохтооҕун счетуттан 410 тыһыынча солкуобайын түөкүттэр сойботон ыллылар!
Ол курдук биир дьахтарга «баан куттал суох буолуутун сулууспатыттан» эрийдибит диэн, кини аатынан атын дьон кирэдьиит оҥотторбуттарын туһунан кэпсээбиттэр. Уурунуутун харыстыыр сыалтан, харчытын устан баран, ыстараап ааҕыллыбатын туһугар, түргэнник харчытын терминал нөҥүө ыйыллыбыт счекка ыытарыгар сүбэлээбиттэр. Бу кэнниттэн быраап уорганнарыгар үлэлиибин диэн биир киһи төлөпүөннээбит. Итиэннэ «баан исписэлиистэрин» сүбэтин ылынан, харчытын били счекка ыытарын туһугар эппит. Дьахтар итэҕэйэн, харчытын барытын эппит счеттарыгар ыыппыт. Түмүгэр, 410 тыһ. солк. суох хаалбыт.
Полиция үлэһиттэрэ маннык төлөпүөнүнэн эрийэн кэлэр дьоҥҥо олох итэҕэйимэҥ диэн сүбэлииллэр. Баан уонна полиция үлэһиттэрэ хаһан даҕаны киһиттэн тус бэйэтин туһунан информацияны ирдиир бырааптара суох. Ону өйдөөҥ!
edersaas.ru
Хаартыска http://aist.acxk.ru/