Түөкүттэр баан каартатыттан харчыны уоран устарга араас ньыманы толкуйдууллар.
edersaas.ru
Бааҥҥа уурунуугут уонна пластик каарталаргыт нүөмэрдэрин билбэт дьоҥҥутугар эппэккитигэр сүбэлииллэр.
Түөкүттэр ордук кырдьаҕастарга, биэнсийэлээхтэргэ төлөпүөннээн, араас сулууспа үлэһиттэрин курдук кубулунан бэйэлэрин билиһиннэрэллэр уонна кистэлэҥнэри ыган ыла сатыыллар.
РФ Биэнсийэҕэ пуондатын Саха сиринээҕи отделениетын исписэлиистэрэ иһитиннэрбиттэринэн, кинилэр тус чахчылары ылаары эбэтэр ситэтэ суох докумуону быһаарсаары хаһан да килийиэннэригэр төлөпүөннээбэттэр уонна дьиэлэринэн сылдьыбаттар.
Биэнсийэҕэ төлөбүрдэри уо.д.а. чахчылары биэнсийэ пуондатын сайтыгар тус кэбиниэккэ киирэн, смартфоннарга пуонда сыһыарыытыгар уонна судаарыстыбаннай сулууспалар порталларыгар эрэ көрүөххэ сөп.
Ханнык да түгэҥҥэ билбэт дьоҥҥутугар итэҕэйимэҥ. Түөкүттэр киһи толору аатын-суолун, пааспарын уонна СНИЛС нүөмэрин билэн, «туһа таһаарынар» дьыалаларыгар туһаныахтарын сөп.
Биэнсийэҕэ сыһыаннаах боппуруостары Саха Өрөспүүбүлүкэтин биэнсийэҕэ пуондатын отделениетын 8-800-100-99-74 нүөмэригэр эрийэн билсиҥ. Ханнык баҕарар төлөпүөнтэн, ол иһигэр суотабайтан, эрийэргит босхо.
Ону сэргэ, РФ Биэнсийэҕэ пуондатын www.pfrf.ru саайтыгар «Хантаактар уонна аадырыстар» түһүмэххэ киирэн, Саха Өрөспүүбүлүкэтигэр уонна Дьокуускай куоракка баар территориятааҕы уорганнар хантаактарын булуохха сөп.
Надежда ЕГОРОВА, «Саха сирэ» хаһыат, edersaas.ru