Баан каартатын кытта сибээстээх түөкүннээһин угаайытыгар киирэн биэрбэт туһугар сэрэтэр үлэ нэһилиэнньэҕэ тиһигин быспакка ыытыллар. Ол эрээри, дьон син биир киирэн биэрэ турар. «Мин оннукка түбэһиэм суоҕа» дии саныыр буоллаҕа, хас биирдии киһи.
Ол курдук, Саҥа дьыллааҕы уһун сынньалаҥ кэмигэр Ньурба улууһун полициятын дьуһуурунай чааһыгар 18 саастаах кыыс эрийбит. Кини быһаарбытынан, ааспыт сылга ноутбугун атыылыыр туһунан биллэрии биэрбит. Онуоха биир киһи «атыылаһабын» диэн эрийбит. Уонна баанын каартатын нүөмэрин этэригэр көрдөспүт. Кыралаан төлүөм, бастаан 6 тыһ. солк. харчыны ыытыам диэбит. Кыыс нүөмэрин этэн биэрбит.
Ол кэнниттэн кыыс төлөпүөнүгэр бигэргэтэр кодтардаах смс-иһитиннэриилэр кэлитэлээбиттэр, ону барытын эрийбит киһиэхэ этитэлээн испит. Онтон кэпсэтэн бүппүттэрин кэнниттэн, каартатыгар харчы киирбитин туһунан буолбакка, харчы устубуттарын туһунан иһитиннэриилэр кэлбиттэр.
Ол түмүгэр, кыыс баанын каартатыттан 21.600 солк. харчыны устубуттар.
Бу чахчынан билигин бэрэбиэркэ барар.
Полиция өссө төгүл сэрэтэр: интэриниэтинэн атыылыырга-атыылаһарга болҕомтолоох буолуҥ! Пааспаргыт дааннайдарын, бааҥҥыт каарталарын ПИН-кодтарын кимиэхэ да этимэҥ!
Түөкүттэр сарсын эйиэхэ эрийиэхтэрин сөп, сэрэхтээх буолуҥ!
Биһиги корр., «Саха сирэ» хаһыат, edersaas.ru
Хаартыска: интэриниэттэн