Төхтүргэ уһуйаан тутулларыттан олохтоохтор улаханнык үөрэн, сүргэлэрэ көтөҕүллэн сылдьаллар.
Бүгүн, балаҕан ыйын 23 күнүгэр, Хаҥалас улууһугар Төхтүргэ 90 миэстэлээх «Кэнчээри» уһуйаан тутуутугар үлэ саҕаланна.
Санатан эттэххэ, былырыын СӨ Ил Дархана үлэтинэн улууска тиийэ сылдьан, оскуолаҕа киириэн иннинээҕи саастаах оҕолорго саады тутуу боппуруоһун быһааралларыгар, кылгас болдьоххо бырайыактыыр-сметнай документацияны оҥороллоругар соруйбута.
—Төхтүргэ сыл ахсын оҕо ахсаана элбээн иһэр. Онуоха биир сылынан бары ирдэбилгэ эппиэттиир аныгылыы тутуулаах саҥа уһуйаан баар буолуоҕа. Төхтүр, Хаҥалас улууһа, өрөспүүбүлүкэ, дойду иннин диэки дохсуннук хардыылыырыгар, сайдарыгар эрэнэбин. Онуоха түмсүүлээх, сомоҕолоһуулаах буолуохтаахпыт. Өрөспүүбүлүкэ модун күүһүн, кыаҕын оҥорор үлэ дьонугар, эһиэхэ эрэнэбин, — диэн бэлиэтиир Ил Дархан.
Саҥа уһуйаан эһиил, 2023 сылга, үлэҕэ киириэхтээх. Тутуу 2022 сылга инвестиционнай бырагыраама иитинэн уонна 2023-2024 сс. былаанынан ыытыллар. Генеральнай бэдэрээччит — «АЭБ Капитал» ХЭУо, тутааччы «Восток Капитал» ХЭУо.
Уопсайа 1 406,52 кв. м. иэннээх икки мэндиэмэннээх таас дьиэҕэ 15-тии миэстэлээх алта бөлөх, успуорт саалата, муусука хоһо, медпуун, ас-үөл бэлэмниир сир баар буолаллар. Оҕо саадын таһыгар оонньуур былаһааккалар былааннаналлар.
Уһуйаан сэбиэдиссэйэ Анна Афанасьева этэринэн, дьыссаакка билигин 70 оҕо сылдьар, итинтэн 20 кырачаан дьааһыла иитиллээччилэрэ. Кэлэктиип оҕо дьоҕурун сайыннарарга улахан болҕомтотун уурар. Кырачааннары анал бырагырааманан хомуска оонньуурга уһуйаллар, шахматтыырга, дуобаттыырга эрчийэллэр, робототехникаҕа үөрэтэллэр.
Бу иннинээҕи мас дьиэлэрэ 1968 сыллааҕы тутуу.
Өрөспүүбүлүкэ үрдүнэн 2022 сылга Үөһээ Бүлүүгэ, Бүлүүгэ, Ньурбаҕа, Сунтаарга, Орто Халымаҕа, Уус Алдаҥҥа уопсайа 260 миэстэҕэ алта уһуйаан, ону таһынан, Үөһээ Бүлүүгэ, Эдьигээҥҥэ, Ньурбаҕа, Чурапчыга түөрт оскуола-саад үлэҕэ киириэхтэрэ. Оттон былырыын өрөспүүбүлүкэ 10 оройуонугар 13 уһуйаан үлэҕэ киирбитэ.
—Уһуйаан тутуутун саҕалааһын, дойдубут судургута суох кэмтэн санааҕа түһэн олорор кэмигэр буолла. Ол да буоллар, мин дойдутун туһугар бэриниилээх, сомоҕолоһуулаах дьоммутугар, өрөспүүбүлүкэ, Хаҥалас улууһун олохтоохторугар махтанабын. Биһиги хоруйбут: сарсыҥҥы күҥҥэ, сырдыкка, инникигэ, оҕолорбут көҥүл, күүстээх Арассыыйаҕа улааталларыгар эрэллээхпитин көрдөрөбүт, — диэтэ Ил Дархан.
Хаартыскаларга Андрей Сорокин (СИА) түһэриитэ.
+1
+1
+1
+1
+1
+1
+1