Былырыын Сунтаарга «Үтүө дьыаланы оҥорооччу» сыла биллэриллэн, улуус олохтоохторо үтүө дьыаланы оҥорууга үгүс хабааннаах үлэни ыыппыттара. Ордук пандемиянан сибээстээн волонтердар үлэлэрэ күүһүрбүтэ.
— Бу күннэргэ «Үтүө дьыаланы оҥорооччу» сылын түмүктүүр уонна «Дьиэ кэргэн сылын» арыйар тэрээһин буолуохтаах. Ол иннигэр Сунтаар улууһун култууратын салалтата култуура тэрилтэлэригэр уонна үлэһиттэригэр бастыҥ үтүө дьыаланы оҥорооччулары бэлиэтиэхтээхпит. Онтон биирдэстэрэ Аллыҥа кулуубун харабынайа Борокуоппай Саввинов. Кини кулуупка үлэлээбитэ ыраатта. 57-лээх Борокуоппай үлэтин чааһын кэнниттэн иккис үлэтигэр – буор босхо дьоҥҥо үтүөнү оҥорууга ыстанар. Холобур, бэҕэһээ үтүө дьыаланы өрө тутааччы, бочуоттаах сынньалаҥҥа олорор Евгенияҕа муус киллэриититтэн үлэтин саҕалаата, ону кытта килиэбин ылан биэрдэ. Салгыы өссө биир кырдьаҕаска Елизавета Сидороваҕа маһын хайытан киллэрдэ. Борокуоппай волонтер диэн тыл биһиги күннээҕи олохпутугар үөдүйэ инниттэн, куруутун маннык көмөлөһө сылдьар үтүө санаалаах киһи. Хоруона хамсыга туруоҕуттан, эдэр атаһынаан Антоннуун волонтерунан олус бэриниилээхтик үлэлииллэр. Олохтоох дьон кинилэргэ махталлара муҥура суох, — диэн култуура управлениетын салайааччыта Мария Кобельянова иһитиннэрдэ.
edersaas.ru