Атырдьах ыйын 8 күнүгэр «Үрдэл» пааркаҕа үлэбитин, ситиһиилэрбитин сырдатар, түмүктэрбитин таһаарар күн буолан ааста.
Ол курдук, биһиэхэ «Үтүө дьыала кубога» хамсааһыммыт үлэтин түмүктүүр, үйэтитэр кэрдиис кэмнэрэ саҕаланнылар. Бу хамсааһыммыт туһунан
Инстаграмынан, сонуну киэҥник тарҕатар сириэстибэлэринэн матырыйааллар тахсыыларын икки сыл устата ситиһэн кэллибит. Үлэбитин сиһилии кэпсиир, хаартысканан көрдөрөр кинигэ бэлэмнэнэ сылдьар.
«Үөһээ Бүлүү-85» идеятынан үйэлэргэ хаалар документальнай киинэ бырайыага үлэтин саҕалаан, бастакы саҕалаабыт үс улуус холбоон, үбүлээн таһаарбыт видеоролига бэҕэһээ сүрэхтэннэ. Дьиҥнээх киинэ быһыытынан үлэтэ ахсынньы ыйга түмүктэнэрэ былааннанар. Бу киинэлэр инникитин өрөспүүбүлүкэтээҕи видео-аудио архыыптарга, телевидение пуондатыгар үйэлээх хараллыыга киллэриллиэхтэрэ.
Ону сэргэ, бу күннэргэ Сахабыт сирин улуустарыгар буола турар ыксаллаах балаһыанньаттан биһиги, «85 выпустар» түмсүүбүт, туора турбакка, аадырыстаах көмөҕө үтүө санаабытын, дьыалабытын холбуурга быһаарыы ылынныбыт.
Ол курдук, Горнай улууһун Бэс Күөлүгэр олорор биир үөлээннээхпит алдьархайдаах баһаарга дьиэтэ суох туран хаалбытыгар аадырыстаах көмөбүтүн анаан, харчынан, туттар малынан көмө аахсыйабытын саҕалаатыбыт.
Өрөспүүбүлүкэ улуустарынан тарҕанан олорор биир үөлээннээхтэрбит ортолоругар баһаар умулларыытыгар миэстэтигэр үлэлии сылдьааччылар аҕыйаҕа суохтар.
«Саха сирэ», edersaas.ru сайтка анаан Маргарита СТЕПАНОВА (АКИМОВА)