Cаха сирин киэн киэлитин иилии эргийэр аналлаах “Үтүө дьыала кубога” Сомоҕолоһуу күнүн көрсө, Уус Маайа улууһугар оскуоланы 1985 сыллаахха бүтэрбиттэргэ туттарылынна.
edersaas.ru
“Үтүө дьыала кубога” бу иннинэ күөх Ньурбаттан куорсун анньынан, Үөһээ Бүлүү, Бүлүү, Горнай, Нам, Уус Алдан, Мэҥэ Хаҥалас, Амма улуустарынан эргийэн кэллэ.
Кыттааччылар этэллэринэн, кэннилэрин хайыһан көрдөхтөрүнэ, хас биирдии сиргэ олус суолталаах, дириҥ ис хоһоонноох, киэҥ далааһыннаах үлэлэр ыытылыннылар.
Ол курдук, Ньурба улууһугар 100 тыһыынча суумалаах оҕо былаһааккатын тутуу, Үөһээ Бүлүү улууһун Далыр орто оскуолатын учууталыгар дьиэ тутан биэрии, Бүөтүр Тобуруокап мусуойугар улахан субуотунньугу тэрийии, Бүлүү куоракка 85 тыһыынча сууммалаах сквер оноруута, Горнайга суол оҥоһуутугар кыттыы, Намҥа пааматынньыктары көрүүгэ-истиигэ үтүө дьыаланы бастакынан саҕалааһын, Уус Алдан улууһугар Доҕордоһуу мусуойугар баар сынньанар сиргэ ыскамыайкалары, остуолу оноруу, Мэнэ Хаҥаласка Олоҥхо дьиэтигэр аркалары туруоруу, “Ким да умнуллубат, туох да умнуллубат” пааматынньыкка суруктары суруйуу, Аммаҕа Уус Майаттан былыргы суолунан таһаҕас тиэйбиттэргэ аналлаах бэлиэни сөргүтэн оҥоруу – маннык улахан суолталаах хамсааһыннары барытын өрөспүүбүлүкэ оскуолаларын 1985 сыллаахха бүтэрбиттэр түмсэн оҥордулар. Маны сэргэ, хас биирдии улууска үтүө санаа аахсыйаларын, субуотунньуктары, көрсүһүүлэри, кыамматтарга уонна кырдьаҕастарга ас бородууктатынан көмөлөһүүнү, кэнсиэртэри уо.д.а тэрийдилэр.
Ити курдук, “Үтүө дьыала кубога” өрөспүүбүлүкэ улуустарын оскуолаларын 1985 сыллаахха бүтэрбиттэри муста, түмтэ, сомоҕолоото, улуустарынан, нэһилиэктэринэн үтүө дьыаланы оҥоро сылдьаллара Сомоҕолоһуу сылыгар ордук суолталаах.
Саха сирин 9 улууһугар сылдьыбыт кубок салгыы Алдан, Нерюнгри, Өлүөхүмэ улуустарынан айаннаан, өрөспүүбүлүкэни бүтүннүү эргийэн, 2020 сылга оскуоланы бүтэрбиттэрэ 35 сыллаах үбүлүөйдээх түһүлгэтигэр Дьокуускайга кэлэрэ былааннанар.
Надежда ЕГОРОВА, “Саха сирэ”, edersaas.ru