Өрөспүүбүлүкэҕэ араас сылларга оскуоланы бүтэрбит түмсүүлэр Ийэ дойдуга бэриниилээх буолуу сылыгар араас тэрээһиннэри ыыталлар.
edersaas.ru
Бу күннэргэ 1985 сыллаахха оскуоланы бүтэрбиттэр тэрийиилэринэн улуустарынан «Үтүө дьыала» Кубогын туттарыы ыытылла турар. Ол курдук, бу сылга оскуоланы бүтэрбит дьон массыынанан сылдьан, Кэбээйи нэһилиэгэр кэллилэр. Автодесаҥҥа Үөһээ Бүлүү, Мэҥэ Хаҥалас, Орто Халыма, Бүлүү бэрэстэбиитэллэрэ бааллар. Бу сыллаах выпустар «Үтүө дьыала» Кубогын улуустарынан кэритэн айаннаан иһэллэр. Кубок Кэбээйи улууһугар уон хонон баран, салгыы айанныаҕа.
Уопсастыбаннай хамсааһын үлэтин туһунан Кэбээйиттэн уопсастыбанньык Татьяна Максимова-Лазарева маннык билиһиннэрэр:
— Бу идиэйэни ньурбалар олоххо киллэрбиттэр. Кинилэр Кубогы сахалыы тыыннаан, ис хоһоонноон оҥорбуттар.
Улуус аайы выпустар бэйэлэрин гербэлэрин сыһыаран иһэллэр. Кэбээйилэр Кубокка 20-с нүөмэринэн гербэлэрин сыһыардылар. Кубок номнуо Анаабырынан, Өлөөнүнэн, Орто Халыманан, Эдьигээнинэн айаннаан кэллэ.
Айан анал былааннаах, ол кыраапыктан ким да тахсыбат. Атырдьах ыйын 2 күнүгэр «Үтүө дьыала» Кубога Дьокуускайга тиийиэхтээх. Быйыл 1985 сыллаахха бүтэрбит выпустар улуус аайы 35 сыллаах үбүлүөйдэрин бэлиэтээри былааннана сылдьаллар. Бу тэрээһин 1983 сыллаахха бүтэрбит выпускниктар хамсааһыннарын өйөөн ыытыллар.
Десант кыттыылаахтара Кэбээйи нэһилиэктэринэн сылдьан «Үтүө дьыала» Кубок сыалын-соругун сырдатар сыаллаах «төгүрүк остуоллары» тэрийдилэр, араас ис хоһоонноох кинигэлэри бэлэхтииллэр, нэһилиэктэр уопсастыбанньыктарын, кырдьаҕастарын, оскуола оҕолорун кытта көрсөллөр, араас патриотическай тыыннаах аахсыйаларга, тэрээһиннэргэ кыттыыны ылаллар.
«Үтүө дьыала» Кубога Кэбээйи улууһугар олунньу 24 күнүгэр диэри улуус нэһилиэктэрин тилийэ сылдьыаҕа. Онтон эстафета салгыы Эбээн-Бытантай улууһугар айанныаҕа.
Елена ПОТОЦКАЯ, «Саха сирэ» хаһыат, edersaas.ru