Арассыыйаҕа тыа хаһаайыстыбатыгар быйылгы хомуур хайдах түмүктэнэн эрэрий?
Аҕыйах хонуктааҕыта РФ Бырабыыталыстыбатын мунньаҕа буолан ааста. Мунньаҕы Михаил Мишустин салайан ыытта. Онно Бүтүн Арассыыйатааҕы биэрэпис хаамыытын уонна хомуур түмүгүн дьүүллэстилэр.
Хомуур түмүгүн Дмитрий Патрушев кэпсээтэ. Кини 2021 сылга күн-дьыл кэккэ ыарахаттары үөскэппитин аҕынна. Саас ыһыы үлэтэ 2-3 нэдиэлэ хойутаабытын, онтон салгыы сезон устата Поволжьеҕа, Уралга уонна Киин Черноземьеҕа кураан сатыылаабытын, Саха сирэ улахан баһаардары көрсүбүтүн санатта. Онон 16 эрэгийиэҥҥэ ыксалаах быһыы-майгы эрэсиимэ биллэриллэ сылдьыбыт.
Ол да буоллар, 119 мөл туонна бурдук хомуллубут, итинтэн 77,8 мөл – сэлиэһинэй. Сыл түмүгүнэн бункерка ыйааһынынан 127 мөл туоннаҕа суоттаналлар.
Билиҥҥи туругунан 21 мөл туонна арыы буолар култууралары хомуйбуттар. Подсолнечник уонна соя көрдөрүүтэ үчүгэй.
7 мөл туонна оҕуруот аһын хомуйуохпут дииллэр. Тэпилииссэлэргэ көрдөрүү 1,4 мөл туоннаҕа тэҥнэһиэҕэ.
Билигин 33 мөл туонна саахар сүбүөкүлэтин үүнүүтүн ыллылар. Былырыыҥҥытааҕар 5,7 мөл туоннаны элбэҕи хомуйуохтара.
Төһө да хортуоппуйга күн-дьыл бөрүкүтэ суох сабыдыаллаатар, хайы-үйэ 5,9 мөл т ылбыттар.
Салгыы кини сезоннай хонуу үлэтин ыытыыга материальнай уонна тиэхиньикэ өттүнэн хааччыллыыга тохтоон, билиҥҥи туругунан тыа хаһаайыстыбатын салаатыгар 567 тыһыынча тыраахтар уонна комбайн баарын эттэ.
Чэпчэтиилээх лизинг, чэпчэтиилээх кирэдьиит көмөтүнэн аграрийдар туһаммыттар. 2021 сылга уопсайа 62,8 тыһ. тиэхиньикэни уонна оборудованиены ылыахтаахтар.
2021 сылга эрэгиийэннэргэ судаарыстыба көмөтүнэн 96,3 млрд солкуобай көрүллүбүт. Россельхозбаан уонна “Сбер” быйыл 632,7 млрд солкуобайдаах кирэдьиити биэрбиттэр.
РФ Бырабыыталыстыбатын саайтыттан
Бэлэмнээтэ Женни Стрюкова
Хаартыска: тустаах саайтан