Түбэй Дьаархантан төрүттээхтэр Маайынан биир дойдулаахтарыгар дьоһун бэлэх оҥордулар
Сунтаар улууһун Түбэй Дьаархан нэһилиэгиттэн төрүттээхтэр, өрөспүүбүлүкэ араас улуустарыгар уонна киин куоракка олорор дьон түмсүүлэрэ оскуола оҕолоругар бэртээхэй бэлэҕи оҥордулар.
edersaas.ru
Сергей Зверев аатынан Түбэй Дьаархан орто оскуолатын үөрэнээччилэрэ дистанционнай үөрэххэ тутталларыгар анаан, түмсүү кыттыылаахтара смартфон ылан ыыттылар. Ону бүгүн, 1 Маай күнүгэр, тустаахтарга туттардылар.
— «Дойдум — Түбэй Дьаархан» диэн биир дойдулаахтарбыт бөлөҕүн чилиэннэрэ Раиса Семёновна, Афанасий Валериевич көҕүлээһиннэринэн, 125 тыһыынча солкуобай харчыны хомуйаннар, 15 устуукка смартфоны атыылаһан бэҕэһээ ыыппыттара.
Ону бүгүн, Күөх Маай бырааһынньыгынан, кыра дохуоттаах ыаллар оҕолоругар сэмэй бэлэх оҥорон туттардыбыт. Ити иһин оскуола үлэһиттэрэ, нэһилиэк олохтоохторо биир дойдулаахтарбытыгар махтанабыт! – диир олохтоох орто оскуола учуутала Любовь Титова.
Раиса Сибирякова, «Саха сирэ» хаһыат, edersaas.ru