Сунтаар улууһугар Бүлүү өрүс уута киртийбитин туһунан видеоустуу бу күннэргэ социальнай ситимнэринэн тарҕаммыта. Ол гынан баран, видеоҕа чопчу миэстэтэ ыйыллыбатах этэ.
Видеоны тута көрөөт да, олохтоох судаарыстыбаннай иниспиэктэрдэр Сунтаар, Кириэстээх уонна Мэйик сэлиэнньэлэр учаастактарынан өрүһү кэтээн көрүүлэрин түмүгүнэн, киртийии баар сирин булбатахтар. Оттон уһун көрдөөһүн түмүгүнэн биллибитэ, видеоны Түбэй Дьаархаҥҥа устубуттар эбит.
«Бу видеоны Түбэй Дьаархаҥҥа устубуттара билиннэ. Олохтоохтор сүөһүлэрин өрүскэ уулаталлар. Ойбон өрүс кытылыттан уон миэтэрэлээх сиргэ баар. Дириҥэ (муус халыҥын аахпатахха) 40-ча см курдук. Ойбон уута кугастыҥы өҥнөөх. Кыһыҥҥы өттүгэр уу таһыма түһэн, уу сүүрүгүрбэт. Аны өрүс түгэҕэ былыыктаах, туойдаах», — диэн СӨ Экологиятын министиэристибэтин пресс-сулууспата иһитиннэрдэ.
Иниспиэктэрдэр бу сиртэн уу боруобатын ылан Ньурбатааҕы лабораторияҕа ыыппыттар.
edersaas.ru