Айылҕаҕа барыта талбыт курдук буолбат, дьыл кэлиитэ араастаан салаллар. Быйыл саас Эҥсиэли хочотугар олус тымныы этэ, сайын саҕаланыыта курааннаабыта.
edersaas.ru.
Бэс ыйын устатыгар халлаантан биир таммах уу түспэтэҕэ окко да, оҕуруокка да сүрдээҕин охсубута. Аны туран хаһаайыстыбалар арыыга саҥа оттоон эрдэхтэринэ, өрүскэ уу кэлэн, нэдиэлэни быһа турбута. Инньэ гынан, Нам улууһа оттооһуҥҥа кыраапыктан балачча хаалбыта. Ону ситиһээри хаһаайыстыбалар билигин өссө күүскэ түһүнэн үлэлииллэр. Оттооһун хаамыытын туһунан тыа хаһаайыстыбатын департаменын агронома Сардаана Новгородова маннык кэпсиир:
— Улуус үрдүнэн 35 тыһ. 458 туоннаны оттоотохпутуна, сүөһүбүтүн-сылгыбытын холкутук кыстатыахтаахпыт. Бастаан үүнүү мөлтөх буолан уонна арыыга кэлбит уу уһуннук турбутугар, хаһаайыстыбалар атын улуустарга көһөн оттуох курдук сананан баран, кэлин от син көбөөн, бэйэ сиригэр оттуурга быһаарыммыттара. Бүгүҥҥү туругунан, 23 тыһ. 406 туоннаны кэбиһэн, сыл тахсар оппут 77 %-ын хааччынныбыт. Сааскы уу угуттаан, өрүс уҥуор нэһилиэктэргэ үүнүү куһаҕана суох. Ол курдук, 1 тыһ. 424 туонна былааннаах Түбэ нэһилиэгэ 1 тыһ. 458 туоннаны оттоон, сорудаҕын 104 % толордо. Былааннаах отторун Үөдэй 83 %, Арбын 80 %, Көбөкөн 79 %, Фрунзе 89 %, Искра 78 % булуннулар. Оттон бэтэрээ эҥээр сорох нэһилиэктэр сорудахтарын аҥарын эрэ ылан олороллор. Инньэ гынан, былааммыт 88 %-ын толордорбут дэһэбит. Тиийбэт оппутун атын улуустартан атыылаһарга суоттанабыт. Билиҥҥитэ Хаҥалас Нөмүгүтүн уонна Кэбээйи Сииттэтин кытары 600-чэкэ туонна оту, 50 туонна сенаһы атыылаһарга дуогабардастыбыт. Атын улуустар мантан күһүн ааҕынан-суоттанан баран, төһө оту биэрэр кыахтаахтарынан көрөн сайаапка ылыахтаахтар. Кэлэ-кэлэ түһэ турар ардах быыһыгар дьаһаллыбыт буолан, оппут хаачыстыбата мөлтөх, туустуу-туустуу кэбиһэбит. Ону таһынан сүөһү сүмэһиннээх аһылыгын төһө кыалларынан элбэҕи бэлэмниир соругу туруорабыт. Саас «Сэргэ» бааһынай хаһаайыстыба 100 гектарга, «Дайар» кэпэрэтиип 250 гектарга биир сыллаах оту ыспыттарын быһан, сиилэстии сылдьаллар. Билиҥҥи туругунан, 600 туонна сиилэһи уктулар. Былаан быһыытынан барыта 970 туоннаны бэлэмниэхтээхтэр.
Модукка Роман Новиков 200 гектар бааһынаҕа ыспыт бурдугун хомуурун саҕалаата. Маны тэҥинэн оҕуруот аһын хомуура эмиэ саҕаланна. Хаһаайыстыбалар саас хаппыыстаны 29 гектарга, моркуобу 37 гектарга, сүбүөкүлэни 52 гектарга, хортуоппуйу 502 гектарга олордубуттара. Сайын саҕаланыыта курааннаан баран, сайын иккис аҥарыттан ардаан, оҕуруот балачча өрүттүбүтэ, онон үүнүү куһаҕана суох.
Раиса Сибирякова, «Саха сирэ» edersaas.ru.