Бэҕэһээ Дьокуускай куоракка СӨ дуобакка федерациятын бэрэсидьиэнинэн таһаарыылаахтык үлэлээбит Александр Романов аатынан өрөспүүбүлүкэтээҕи турнир бэрт тэрээһиннээхтик буолан ааста.
Александр Романович өрөспүүбүлүкэҕэ үтүөкэннээх, киэҥ билиилээх-көрүүлээх салайааччы, чуолаан тутааччы быһыытынан киэҥник биллибитэ. Кини РФ Олоҕун-дьаһаҕын хаһаайыстыбатын бочуоттаах үлэһитэ, СӨ үтүөлээх тутааччыта, Ю.Н.Прокопьев аатынан Судаарыстыбаннай бириэмийэ лауреата, Мэҥэ Хаҥалас улууһун, Дьаҥхаады, Нөөрүктээйи нэһилиэктэрин бочуоттаах гражданиннара, СӨ Судаарыстыбаннай V ыҥырыылаах Мунньаҕын (Ил Түмэн) тутууга, олох-дьаһах хаһаайыстыбатын сис кэмитиэтин бэрэссэдээтэлэ этэ.
Мэҥэ Хаҥалас улууһун баһылыга Николай Старостин: «Биллиилээх биир дойдулаахпыт, мэҥэ хаҥаластар дириҥник ытыктыыр, тумус тутар киһибит аатынан Дьокуускайга Саахымат‒дуобат киинигэр дуобакка үгэс буолбут өрөспүүбүлүкэтээҕи турнир бэҕэһээ буолла.
Александр Романов аатын үйэтитэр бэлиэ тэрээһиҥҥэ Александр Афанасьевич кэргэнэ Елена Романова, Мэҥэ Хаҥалас улууһун уопсастыбаннаһа, СӨ дуобакка федерацията кыттыыны ыллылар. Биһиги ортобутугар бүгүн Александр Романович баара буоллар 58 сааһын туолуохтааҕа.
Бу тэтимнээх олох оргуйар үөһүгэр биһиги бастыҥ дьоммут төрөөбүт норуоттарын, дойдуларын туһугар анаммыт олохторун, сырдык ыраларын, сыралаах үлэлэрин туһунан үтүө өйдөбүлү умнубакка, эрэллээх тирэхпит быһыытынан харыстаан илдьэ сылдьарбыт ытык иэспитинэн буолар», — диэн санаатын үллэһиннэ.
edersaas.ru