Сыырдаах булчуттара тыыннаах көҕөнү, сыарҕа мууһу, отут таас собону оонньоттулар
Байанай ыйыгар Уус Алдан Сыырдааҕар булчуттар түмсүүлэрэ бэрт тэрээһиннээхтик үлэлиир.
edersaas.ru
Субуота киэһэ «Тыа сирин төһүү күүһэ – эр киһи» диэн тэрээһиҥҥэ нэһилиэк талааннаах эр дьоно ырыа ыллаан дьиэрэттилэр, оһуохайдаан ойдулар, бэртээхэй кэнсиэри бэлэхтээтилэр. Ол курдук, Станислав Черкашин уонна Василий Андросов сценкаҕа оонньоон, булт мүччүргэннээх түгэннэрин ойуулаатылар.
Оттон сыырдаахтар сөбүлээн истэр ырыаһыппыт, булчут бэрдэ киһи Валерий Колодезников тапталлаах «Чэмэлиинэтин» ыллаан, барыбыт куппутун тутта.
Булчут эр дьоммут «Уол оҕону үлэҕэ үөрэтии» диэн быыстапкаҕа оҕону иитиигэ уопуттарын атастастылар. Долгутуулаах уонна кэтэһиилээх лотерея оонньотуу саҕаламмытыгар бары долгуйан чуумпуран олордубут. Кырдьык да, бу киэһэ нэһилиэк булчуттара туруорбут бириистэригэр хайа дьоллоох киһи тугу ыларын кэтэһэн, тиритии-хорутуу буолла. Сүрүн бириис да сыаната ботуччу – уу харчынан 25 000 солк. Бу тыа сиригэр биир ыйдаах хамнас!
Булчуттар дьоро киэһэҕэ ох курдук оҥостубуттара харахха быраҕыллар. Ол аҥардас сааланы киэргэтииттэн да көһүннэ. Оттон бириистэрин туһунан киһи этэ да барбат. Гаврил Охлопков тыыннаах көҕөн бирииһи туруорбутун, устудьуон кыыс Настя Ширяева сүүйдэ. Сүүйүүнү бастаан утаа хоруопкаттан хостоору гыммыттара, көҕөммүт көтөн тахса сыһан барыбытын соһутта. Василий Копырин икки куобах, биир курупааскы туруорбутун Станислав Черкашин уонна Роман Ховров сүүйдүлэр.
Өссө биир курупааскыны Прокопий Колодезников сүүйдэ. Дьулус Охлопков куоракка босхо баран кэлии бырайыаһы туруорбутугар Вова Петухов таба тайанна. Дима Петров уонна Иван Ефимов туруорбут быhахтарын Лена Дрищева сүүйдэ. Валерий Колодезников туруорбут быhаҕын Петр Алексеев ылар чиэскэ тигистэ. Иннокентий Барабанскай сууйуллубут, кырбаммыт, хаана кутуллубут ынах иhин туруорбута Саргы Васильеваҕа тигистэ. Булчуттар туруорбут 30 устуука таас соболорун Николай Иванов сүүйдэ. Степан Местников биир сыарҕа муус спонсордаабытын Мария Портнягина сүүйэн үөрдэ-көттө. 2018 сылга спортсаалаҕа ыытыллар бары тэрээһиннэргэ босхо сылдьар билиэт Петр Слепцовка тигистэ. Оттон Леонид Дрищев 4 көлүөһэни босхо оҥорор сертификатын Александр Шепелев сүүйдэ. Оскуола эр дьоно туруорбут 1 сыарҕа муустара Мария Петуховаҕа тиксэн дьоллоото. «Байанай – центр» сертификатын кырдьаҕас байанайдаах булчут Василий Данилов сүүйдэ. Оттон мин саа ыраастыыр наборга тиксэн үөрдүм. Маны таhынан, спонсордар Семен Гоголев, Александр Аммосов, Анатолий Копырин, «Сэргэлээх» ТХПК, Станислав Черкашин, Василий Явловскай туруорбут анал бириистэрин: утуйар мөһөөччүгү, тиэрмэһи, үргэммит куһу, чыккымайдары, эбиэс сиэмэтин, 50 устуука ботуруону, олохтоох дьаhалта туруорбут собо балыгын, «Бадаар» маҕаhыын дьиэҕэ-уокка, булка аналлаах бириистэри сүүйэн, илии тутуурдаах, өттүк харалаах киһи элбээтэр элбээн истэ. Супер-бирииһи Светлана, Александр Платоновтар иллээх дьиэ кэргэннэрэ сүүйдэ. Бирииһи ыал ийэтэ сценаҕа тахсан ылла.
Маннык дьоро киэһэни булчут эр дьоммут бэлэхтээбиттэриттэн олохтоохтор бары олус үөрдүбүт. Эр дьоммут биэчэри таптааллах төрөөбүт дойдуларын Уус Алдан өрөгөй ырыатынан уонна оһуохайынан түмүктээтилэр, —
— диэн кэпсиир орто оскуола учуутала Лариса Черкашина.
Бу курдук, Сыырдаах нэһилиэгин булчуттара олус интэриэһинэй ис хоһоонноох, баай Байанайдара бэрсибититтэн дьонноругар-сэргэлэригэр лотерея тэрийэн түҥэтэн, биэчэргэ буор босхо сырытыннаран, дьоро киэһэни тэрийэн биир дойдулаахтарыгар «Тыа сирин төһүү күүһэ – эр киһи» диэн умнуллубат бырааһынньыгы бэлэхтээтилэр. Уус Алдан Сыырдааҕын булчут эр дьоннорун холобурдарын батыһан, сэтинньи – Байанай ыйа түмүктэниэр диэри, тыа сирин булчуттара, эһиги да түһүнэн кэбиһиҥ!
Елена ПОТОЦКАЯ, «Саха сирэ», edersaas.ru
Хаартыскаҕа Лариса Черкашина түһэриитэ.