Уус Алдаҥҥа Бэрт Ууһун нэһилиэгэр бу күннэргэ стела арыллынна, сыал ытыытыгар күрэхтэһии буолла. Бу туһунан нэһилиэк дьаһалтатын исписэлииһэ Ульяна Копырина кэпсииригэр көрдөстүбүт.
—Биһиги биир дойдулаахпыт, полиция капитана Василий Васильевич Бурцев Муома оройуонугар Улахан Чыыстай нэһилиэгэр тустаах эбээһинэһин толоро сылдьан 2016 сыллаахха кыыллыйбыт дьон илиититтэн олус хомолтолоохтук, абалаахтык былаҕайга былдьаммыта.
Бу ыарахан үлэтигэр эҥкилэ суох бэриниилээхтик ылсыбыт, үрдүк эппиэтинэһи сүкпүт, дьоҥҥо-сэргэҕэ, кыраҕа-кыаммакка куруук көмөлөһө, кинилэри хара санаалаахтартан өрүү харыстыы сылдьыбыт үтүөкэн киһибит аатын үйэтитэн нэһилиэкпитигэр тэрээһиннэр ыытылыннылар. Ол курдук, “Хорсунун иһин” орден кавалера Василий Бурцев төрөөбүт-үөскээбит тапталлаах Сыырдааҕын орто оскуолатыгар өйдөбүнньүк бэлиэ арылынна. Бу бэлиэни Василий Бурцев огдообото Айталы Алексеевна Сергеева, оҕолоро, аҕата Василий Евграфович Бурцев, бииргэ төрөөбүттэрэ, бука бары аймахтара көҕүлээн туруордулар. Василий Бурцев кэргэнэ Айталы Алексеевна, бииргэ төрөөбүттэрэ, улуустааҕы полиция сотрудниктара, бииргэ алтыспыт, үлэлээбит дьоно, табаарыстара, оскуолаҕа бииргэ үөрэммит доҕотторо бу долгутуулаах күҥҥэ кинини иһирэхтик ахтан-санаан аастылар. Айталы Алексеевна тапталлаах кэргэнигэр Василий Бурцевка өлбүтүн кэннэ анаммыт “Хорсунун иһин” орденын оҕолорго көрдөрдө. Салгыы Василий бииргэ үөрэммит доҕотторун аатыттан Николай Иванов улаханнык долгуйан туран тыл эттэ уонна нэһилиэк хамаандата буулдьанан ытыыга утумнаахтык дьарыктанарын туһугар буулдьа сааны бэлэх ууннулар. Орто уонна үрдүкү кылааска үөрэнэр уолаттарга патриотическай өйү-санааны иҥэрэр сыаллаах-соруктаах “Эр санааланыы” кылаас чааһа ыытылынна.
Ол кэнниттэн Г.Г.Черкашин аатынан спорт саалатыгар буулдьанан сыал ытыытыгар күөн күрэс буолла. Манна уопсайа 65 киһи кытынна. Кыраҕы харахтаахтар эрбии тииһин курдук эгил-тэгил кииристилэр. Түмүккэ 50 сааһыгар диэри бөлөххө 1 миэстэни Александр Шепелев ылла. Иккискэ Семен Сенин таҕыста. Үһүс бириистээх миэстэ Николай Ивановка тигистэ. 50-тан үөһэ саастаахтар ортолоругар бэрт сытыы киирсии түмүгэр Гаврил Колодезников бастаата, Владимир Ховров иккистээтэ, Максим Олесов үһүс буолла. Күөн күрэс муҥутуур кыайыылааҕынан тахсыбыт Александр Шепелевка дохсун ытыс тыаһыгар арыаллатан көһөрүллэ сылдьар кубок, Уус Алдан улууһун Ис дьыала отделын сүрүн бирииһэ — «Байанай» маҕаһыынтан ыларыгар тоҕус тыһыынчалаах сэртипикээт, мэтээл уонна грамота туттарылыннылар.
Быйылгы күрэскэ оскуола үөрэнээччилэрэ кыттыбыттара улахан сэргэхсийиини таһаарда. Ол курдук, 3-6 кылаас үөрэнээччилэрин ортолоругар ыытыллыбыт күрэскэ Коля Иванов кыайда. Кинини тилэх үктэһиннэрэн Владислав Барабанскай иккискэ таҕыста, Владислав Колодезников үһүс миэстэ буолла. 8-9 кылаастар ортолоругар Коля Неустроев иннин кимиэхэ да биэрбэтэ, Павел Иванов – 2 миэстэни, Дархан Бурцев – 3 миэстэни ылары ситистилэр.
Долгутуулаах тэрээһин «Василий Васильевич Бурцев идэтигэр бэриниитэ, дьоҥҥо аламаҕай сыһыана, кыраны-кыамматы көмүскэһэрэ, булгуруйбат модун санаата, буруйу оҥорууну кытта эйэлэспэт кытаанах сыһыана хас биирдиибитигэр, кэнчээри ыччакка өрүү холобур буолуоҕа» диэн тылларынан түмүктэннэ, — диэн кэпсээтэ Ульяна Ивановна.
Итиэннэ полиция капитана, “Хорсунун иһин” уордьан кавалера В.В.Бурцев аатынан буулдьанан сыал ытыытын күрэхтэһиитэ үрдүк таһымнаахтык барарыгар бары кыһамньыларын ууран үлэлэспит, спонсордаабыт дьонноругар махтанна. Дойдулаахтарыгар Иван Черкашиҥҥа, Василий Бурцев огдооботугар Айталы Сергееваҕа, оҕолоругар, аҕатыгар Василий Бурцевка, бииргэ төрөөбүттэригэр, Николай Бурцевка, Григорий, Елизавета Васильевтарга, Матрена Данилова, Наталья Троева, Мария Гоголева оҕолоругар, Айталы Алексеевна үөрэх кыһатыгар үөрэммит дьүөгэлэригэр, Василий Бурцев оскуолаҕа биир кылааска үөрэммит оҕолоругар, Уус Алдан улууһун ис дьыала отделыгар (начальник Д.Скрябин) И.Портнягин аатынан Сыырдаах орто оскуолатын кэлэктиибигэр (дириэктэр э.т. Н.Алексеева), бары аймахтарыгар, бар дьоҥҥо көхтөөх кыттыыларын, өйөбүллэрин иһин барҕа баһыыба тылларын тиэртэ.
Сардаана БАСНАЕВА, «Саха сирэ» хаһыат, edersaas.ru