Дьокуускай куорат таһынааҕы Сыырдаах бөһүөлэгин 4 №-дээх оҕо саадыгар Сыырдаахтан уонна куораттан элбэх оҕо сылдьар.
Билигин оҕо саада коронавирус усулуобуйатыгар хайдах үлэлиирин туһунан оҕо саадын сэбиэдиссэйэ, үөрэхтээһин туйгуна, РФ иитиигэ уонна үөрэхтээһиҥҥэ бочуоттаах үлэһитэ Клара Филипповна Федотова маннык иһитиннэрдэ:
— Билигин аҕыйах оҕо сылдьар. Оскуола оҕолоро дьиэлэригэр олорор буоланнар, үксүлэрэ оҕолорун аҕалбаттар. Онон бөлөхтөрү холботолоотубут. Сорох үлэһиттэр оҕо саадын ис өттүн киэргэтиигэ үлэлииллэр. Дьыссааппыт саҥа буолан, үлэ элбэх. Тэхиньиичэскэй үлэһиттэр иккилии чаас буола-буола сууйуу, обработка, салгылатыы ыыталлар. Дьиэбит таһыгар былаһаакканы оҥоруу эмиэ күүтэр.
Куораттан сылдьан үлэлиир үлэһиттэр тэйиччиттэн олорон үлэҕэ көспүттэрэ. Маннык үс үлэһиттээхпит. Уонна кыһалҕалаах өттүлэрэ уоппуска да ылыахтарын сөп да, билиҥҥитэ ким да сайабылыанньа биэрэ илик. Үлэбитигэр кичэл хонтуруолу ааһан киирэбит. Пирометрынан дьыссаакка бары киирээччилэри температураларын бэрэбиэркэлиибит. Санитарнай эрэһиими барытын тутуһабыт. Барыта анал сурунаалга бэлиэтэнэр.
Женни СТРЮКОВА, “Саха сирэ” хаһыат, edersaas.ru
Хаартыскалары К.Ф.Федотова биэрдэ.