СӨ Инновацияҕа, сыыппара сайдыытыгар уонна инфокоммуникационнай технологияҕа миниистир Анатолий Семёнов бырайыактыыр кэмитиэт тутаах салаалар, социальнай эйгэ сыыппараҕа көһүүлэригэр улахан болҕомтотун уурарын иһитиннэрдэ. «Судаарыстыба нэһилиэнньэҕэ оҥорор өҥөлөрүн электроннай форматка көһөрөр үлэ салҕанар. Көрдөрүүлэри ситиһэргэ судаарыстыбаннай былаас уорганнарыгар анал эппиэттээх салайааччылар сыһыарыллалларын учуоттуохпут», — диэтэ.
Экология миниистирэ Сахамин Афанасьев «Экология » салаата сыыппараҕа көһүүтүн туһунан иһитиннэрэригэр, манна олоҕуран «Суол каартата»» оҥоһуллубутун эттэ. Онно сэттэ сүрүн хайысханан тэрээһиннэр көрүллүбүттэр: «Автоматизация КНД», «Цифровизация государственных услуг», «Автоматизация внутренних процессов», «Экологический паспорт» порталы тэрийии, информацияны харыстааһын тиһигин хааччыйыы, о.д.а. Бүгүҥҥү күн туругунан 25 өҥөттөн электроннай көрүҥҥэ 14 көһөрүллүбүт. Миниистир бастакынан нэһилиэнньэ наадыйар, ирдиир өҥөлөрүн электроннай форматка көһөрөргө үлэ барарын этэр.
Мунньах түмүгэр Айсен Николаев трансформация боппуруоһун уонна, уопсайынан, судаарыстыба салалтатыгар реформаны тус хонтуруолга тутарын эттэ. «Кэнники сылга өрөспүүбүлүкэ салалтата сыыппараҕа көһүүтүгэр элбэх үлэ ыытылынна. Ол эрээри, бүгүн итиннэ, толорор уорганнар субъективнай сыһыаннарын кытары сибээстээх кыһалҕалаах боппуруостар бааллар», — диэтэ кини. Итинтэн сиэттэрэн, эрэгийиэн баһылыга хас биирдии министиэристибэ уонна биэдэмистибэ сыыппараҕа көһүүгэ эппиэтинэстээхтэри быһаарарыгар сорудахтаата. Манна эппиэттинэстээхтэринэн салалтаттан эбэтэр кинилэр солбуйааччыларыттан ананыахтаахтар. Маны сэргэ, бырайыактыыр кэмитиэт структурата уларыйарын иһитиннэрдэ. Судаарыстыбаннай салалта сыыппараҕа көһүүтүн бырайыактыыр кэмитиэтин Ил Дархан Айсен Николаев салайар.
СӨ Ил Дархан уонна Бырабыыталыстыба пресс-сулууспата
Андрей Сорокин (СИА) хаартыскаларга түһэриитэ.