ВИДЕО: Сьюзи Крейт кыыһынаан Эмиэрикэттэн сахалыы эҕэрдэлээтилэр

Сомоҕолоһуу күнүнэн Сунтаар улууһун Элгээйи нэһилиэгин олохтоохторун ыраах Эмиэрикэттэн кийииттэрэ Сьюзи Крейт уонна кини кыыһа Кэтрин-Туйаара куйаар нөҥүө эҕэрдэлэрин ыыппыттара социальнай ситимнэринэн тарҕанна.

edersaas.ru

Ийэлээх кыыс олус сэргэхтик биир дойдулаахтарыгар туһаайан маннык эҕэрдэни тиэртилэр:

— Күндү Элгээйи олохтоохторо уонна ыалдьыттара! Биһиги ыраах дойдуттан эһигини  барыгытын Сомоҕолоһуу күнүнэн итиитик-истиҥник ис сүрэхпититтэн эҕэрдэлиибит! Эйэлээх  сомоҕо эрэ элбэҕи ситиһэр, үүнэр, сайдар, киэҥ билиилээх кэрэни кэрэхсиир, сырдыкка тардыһар, элбэҕи тутар-айар. Билиҥҥи кэмҥэ сомоҕо олус наадалаах. Доруобай буолуҥ, дьоллоох буолуҥ! 

Американка Сьюзи Крейт уонна кини кыыһа Кэтрин-Туйаара биир дойдулаахтарын суолталаах бырааһынньыктарынан өрүү эҕэрдэлииллэр. 90-с сылларга учуонай-антрополог АХШ-тан кэлэн Сунтаар Элгээйитигэр чинчийии ыыта сылдьан,  Прокопий Егоровтыын дьоллорун холбоон, ыал буолбуттара. Егоровтар АХШ-га көһөн олороллор.   Кэтрин-Туйаараны аҕатын төрөөбүт тылыгар уһуйан, кыыс аймахтарын кытта сахалыы эрэ кэпсэтэр.

Елена ПОТОЦКАЯ, «Саха сирэ» хаһыат, edersaas.ru

Видео — социальнай ситимтэн.