«Сюрприз» ансаамбыл Бүтүн Арассыыйатааҕы #RussianDance флешмобка кыттыа. Бу туһунан А.Е.Кулаковскай аатынан норуоттар доҕордоһууларын дьиэтин пресс-сулууспата иһитиннэрдэ.
«Сюрприз» үҥкүү ансаамбыла бу флешмобка ыччат дьыалатыгар Федеральнай ааҕыныстыба уонна «Таврида» Арт-кластер аатыттан кыттар диэн суруллар. Аахсыйа Арассыыйа күнүн көрсө ыытыллыахтаах.
«Сюрприз» ансаамбыл видеороликка национальнай уратыны, кэрэ үҥкүүнэн Саха сиригэр тапталын көрдөрөр. Чысхаан оруолугар РФ үтүөлээх артыыһа, СӨ норуодунай артыыһа, С.А.Зверев-Кыыл Уолун аатынан Национальнай үҥкүү тыйаатырын солиһа Дмитрий Артемьев кыттыбыт. «Сюрприз» ансаамбыл уус-уран салайааччыта СӨ култууратын үтүөлээх үлэһитэ, СӨ култууратын туйгуна Ирина Егорова.
Тэрийээччилэр саамай чаҕылхай видеолары талан ыланнар, түмүккэ киллэриэхтээхтэр. Ол уопсай видеоролик федеральнай иһитиннэрэр-биллэрэр маассабай сириэстибэлэргэ уонна социальнай тиһиктэргэ тахсыахтаах. «Сюрприз» ансаамбылбытын өйүөҕүҥ. @surprise_dancegroupe киирэн лайк туруоруоххутун уонна комментарий суруйуоххутун сөп диэн иһитиннэрэллэр.