Саха сиригэр тутуллуохтаах өссө биир мэдиссиинискэй эбийиэк чопчу коронавируһу утары охсуһар Киин буолбатын туһунан СӨ Ил Дархана Айсен Николаев бүгүн сыл түмүгүнэн суруналыыстары кытары көрсүһүүтүгэр тоһоҕолоон эттэ.
edersaas.ru
— Биһиэхэ Саха сиригэр сыстыганнаах ыарыылары эмтиир анал балыыһабыт суох. Онтон ковиды эмтээһин үгүс өттө, билэргит курдук, Дьокуускай куораттааҕы килиниичэскэй балыыһа пульмонология отделениеларыгар ыытылынна.
Биллэн турар, пандемия биһиги ыарыыны утары охсуһарбытыгар эрэ буолбакка, сыстыганнаах ыарыылары эмтиир балыыһа систиэмэтин толкуйдуурбутугар күһэйдэ. Онон, Кардиология уонна Онкология кииннэрин кэнниттэн биһиги өрөспүүбүлүкэтээҕи улахан инфекционнай балыыһа боппуруоһун федеральнай киини кытары быһаарыахтаахпыт. Мин итинник сорудаҕы былырыын бырабыыталыстыбаҕа биэрбитим. Билигин эбийиэк бырайыактыыр-сметалыыр докумуоннара түмүктэннилэр, аны судаарыстыба экспертизатыгар сылдьар. Мин эрэнэ саныырбынан, эһиилги сыл үс маҥнайгы ыйыгар бүтэһиктээх бырайыактыыр докумуоннар бэлэм буолуохтара.Өскөтүн Саха сиригэр ковид курдук ыарыылар турар түгэннэригэр биһиги анал бэлэм эбийиэктээх буоларбыт туһугар бу өрөспүүбүлүкэҕэ олус наадалаах улахан эбийиэгинэн буолуоҕа.
Надежда ЕГОРОВА, «Саха сирэ», edersaas.ru