Сыстыганнаах дьаҥ балаһыанньата уустук улуустарын баһылыктара уоппускаҕа барбат буоллулар

06.08.2021

Бөлөххө киир:

Ил Дархан Айсен Николаев уустук эпидемиологическай балаһыанньалаах улуустар баһылыктара уоппускаҕа барыылара бобулларын туһунан бүгүҥҥү суһал ыспаап мунньаҕар иһитиннэрдэ.

Ил Дархан уонна СӨ бырабыыталыстыбатын пресс-сулууспата иһитиннэрбитинэн, суолталаах мунньахха өрөспүүбүлүкэ Аҕа баһылыга хааччахтаммыт миэрэлэри тутуспат Мииринэй оройуонун дьаһалтатын сэмэлээн туран, бу улууска суһал ыстаап мөлтөх үлэтин ыйда. Итиэннэ сыстыганнаах дьаҥ кэмигэр тыҥааһыннаах усулуобуйаны үөскэппит улуустар баһылыктара уоппускаҕа баралларын тохтоторго быһаарда.

«Баһылыктар ханна да барбакка, үлэлиир улуустарыгар олорон, балаһыанньаны төрдүттэн истэ-билэ, хонтуруоллуу олоруохтаахтар. Эһиги, норуот талбыт баһылыктара, суһал ыстааптар салайааччыларынан буолан туран, дьон доруобуйатыгар уонна олоҕор тус эппиэти сүгэҕит», — диэн бэлиээтэ Ил Дархан Айсен Николаев.

Сыстыганнаах дьаҥ тарҕаныыта олус түргэн. Онон балаһыанньа олус тыҥааһыннааҕынан сибээстээн, Аҕа баһылык Мииринэй, Алдан, Нерюнгри, Сунтаар уонна Таатта улуустарын баһылыктарыттан буола турар балаһыанньаны ыйыталаста.

«Бүгүҥҥү күҥҥэ COVID-19 ыарыы 19 улууска бэлиэтэннэ. Аҕыйах хонук иһигэр ыарыы эмискэ олус түргэнник тарҕанна. Билиҥҥи чахчынан, Дьокуускайга уонна 14 оройуоҥҥа реанимацияҕа 102 ыарыһах сытар. Онтон 26 киһи олус ыарахан туруктаах», — диэн бэлиэтээтэ Айсен Николаев.

Ил Дархан өрөспүүлүкэ улуустарын уонна нэһилиэктэрин баһылыктара киин сирдэртэн уонна Дьокуускай куораттан уоппуска кэнниттэн дойдуларыгар төннөр дьону ураты хонтуруолга ылалларыгар сорудахтаата.

Елена ПОТОЦКАЯ, “Саха сирэ” хаһыат, edersaas.ru

Хаартыска — Андрей Сорокин (СИА)