Сыл саҕаланыыта Арассыыйаҕа Өйдөбүнньүк уонна Албан аат сыла биллэриллибитинэн «Без срока давности» диэн үөрэнээччилэр икки ардыларыгар Бүтүн Арассыыйатааҕы өйтөн суруйууга куонкурус ыытыллыбыта. Бу куонкуруска Саха сириттэн Константин Сыромятников бастаан, Кыайыы параадыгар ыҥырылынна.
Өйтөн суруйуу куонкуруһугар РФ 85 субъегыттан 5-11 кылаастарга үөрэнэр 133 600 оҕо уонна тастан Арассыыйа посольствотын оскуолаларын 37 үөрэнээччитэ кыттыбыта. Саха сиригэр эрэгийиэннээҕи түһүмэҕи Үөрэҕи сайыннарар уонна идэни үрдэтэр институт иилээн-саҕалаан ыыппыта.
Куонкурус балаһыанньатын быһыытынан, федеральнай түһүмэххэ кыттыбыттар бары финалистар, оттон аҕыс үөрэнээччи кыайыылааҕынан буолар. Үс оҕо үлэтэ баалынан тэҥнэһэн, РФ Үөрэххэ министиэристибэтэ кыайыылаах ахсаанын уоҥҥа диэри элбэппит. Бу уон бастыҥ үлэлээх үөрэнээччилэр кэккэлэригэр Саха сириттэн Дьокуускай куорат 2-с №-дээх оскуолатын 11-с кылааһын үөрэнээччитэ Константин Сыромятников аата киирбитэ. Куонкуруска Константин учууталын Маргарита Егоровна Денисова салайыытынан кыттыбыта.
Кыайыылаахтары Москваҕа Кыайыы параадыгар, ыам ыйын 9 күнүгэр сырытыннарыахтаах, үөрүүлээх быһыыга-майгыга наҕараадалыахтаах этилэр. Ол эрээри, дойду үрдүнэн коронавирус пандемията туран, тэрээһин бу күннэргэ Москваҕа, дьэ ыытылла турар.
Константин Сыромятников атын кыайыылаахтары кытта билигин Москваҕа сылдьар. Кинилэри сарсын РФ Үөрэҕин миниистирэ Сергей Кравцов Поклоннай хайаҕа баар Кыайыы мусуойугар эҕэрдэлиэҕэ. Манна диэн эттэххэ, наҕараадалааһын туох баар санитарнай нуорманы тутуһан буолуоҕа, миниистир тэйиччиттэн туран тыл этиэҕэ, бэл, хаартыскаҕа тэҥҥэ түспэттэр. Кыайыылаах оҕолорго наҕарааданы Арассыыйа дьоруойа Алексей Романов туттарыаҕа.
Үөрүүлээх түгэн кэнниттэн үөрэнээччилэр өйүүн, ыам ыйын 24 күнүгэр, Кыһыл Болуоссакка Кыайыы параадын илэ харахтарынан көрүөхтэрэ. Онон, Константин ийэтин Надежда Романовнаны кытта бу историческай түгэн кыттыылааҕа буолаары үөрүүлэрэ үгүс.
edersaas.ru
Хаартыскалары Константин Сыромятников тиксэрдэ.