Дьокуускай куорат 2-с №-дээх оскуолатын выпускнига Константин Сыромятников сыл саҕаланыыта «Без срока давности» диэн үөрэнээччилэр икки ардыларыгар Бүтүн Арассыыйатааҕы өйтөн суруйуу куонкуруһугар кыттыбыта. Манна бастаан, Константин Кыайыы параадын илэ хараҕынан көрөр чиэстэннэ.
Өйтөн суруйуу куонкуруһугар РФ 85 субъегыттан 5-11 кылаастарга үөрэнэр 133 600 оҕо уонна тастан Арассыыйа посольствотын оскуолаларын 37 үөрэнээччитэ кыттыбыта. Саха сиригэр эрэгийиэннээҕи түһүмэҕи Үөрэҕи сайыннарар уонна идэни үрдэтэр институт иилээн-саҕалаан ыыппыта. Бу улахан куонкуруска бастыҥ үлэлээхтэр кэккэлэригэр биир дойдулаахпыт Константин Сыромятников аата киирбитэ.
Кыайыы көтөллөммүт Константин бэҕэһээ Москваҕа Кыайыы параадын көрбүтүн туһунан саайтпыт ааҕааччыларыгар санаатын үллэстэр:
— Кыайыылаахтары Поклоннай хайаҕа баар Кыайыы мусуойугар эҕэрдэлээбиттэрэ. РФ Үөрэххэ миниистирэ Сергей Кравцов миигин уонна өссө аҕыс призеру наҕараадалаабыта. Оттон дьупулуомнарбытын Арассыыйа Дьоруойа Алексей Романов туттартаабыта. Барыта олус үөрүүллэхтик, тэрээһиннээхтик ыытылынна. Ол эрээри, билиҥҥи балаһыанньаны өйдөөн, куттала суох буолуу эрэсиимин барытын тутуспуппут. Бу тэрээһин Кутурҕан күнүгэр ыытыллыбыта, онон Кутурҕан саалатыгар баар пааматынньыкка сибэкки дьөрбөтүн уурбуппут. Олус долгутуулаах этэ. Мин бу күҥҥэ ыҥырыылаах ыалдьыт буолан тураммын, Умуллубат уот иннигэр эһээм уонна Кыайыы иһин олохторун биэрбиттэр сырдык ааттарыгар сүгүрүйбүтүм.
Москваҕа сырыым сүрүн сыалынан Кыһыл болуоссакка Кыайыы параадыгар кыттыы буолар. Мин бу параакка кыттыыны киһи кыаҕын таһынан дии саныырым. Тэлэбиисэринэн эрэ көрөр тэрээһиним буоллаҕа дии. Оттон Кыһыл болуоссакка сэрии бэтэрээннэрин, атын дойдулар лиидэрдэрин уонна параат атын кыттыылаахтарын кытта бииргэ буоламмын сүргэм олус көтөҕүлүннэ, үөрүүм үксээтэ. Биһиги иннибитинэн байыаннай тиэхиньикэлэр, курсааннар, батальоннар ааспыттара.
Мин эһээм Гаврил Сыромятников хаартыскатын илдьэ сылдьыбытым. Кини 117-с гвардейскай стрелковай полкаҕа сэриилэспитэ. Дьиэ кэргэним уонна доҕотторум Саха сириттэн тэлэбиисэринэн көрөн, мин туспар олус долгуйбуттара.
Быйыл оскуолабын бүтэрдим. Өйтөн суруйуу куонкуруһугар учууталым Маргарита Егоровна Денисова салалтатынан кыттыбытым, онон киниэхэ махталбын тиэрдэбин.
edersaas.ru
Хаартыскалары Константин Сыромятников тиксэрдэ.