Бүгүн РФ бырабыыталыстыбатын вице-премьера, Уһук Илин регионнарга боломуочуйалаах Юрий Трутнев Дьокуускайга кэлэн мунньах ыытта. Мунньахха Уһук Илин регионнары сайыннарар бырагыраама чэрчитинэн, Саха сиригэр тутуллуохтаах эбийиэктэр тустарынан кэпсэттилэр.
Мунньахха Ил Дархан Егор Борисов, бастатан туран, сүрэх, искэҥ ыарыыларын эмтиир кииннэр тутууларын боппуруоһун туруорда. Кини Саха сиригэр дьон үксүн сүрэх, искэн ыарыыларыттан өлөллөрүн бэлиэтээн туран: “Кэлиҥҥи кэмҥэ биһиэхэ бу ыарыылар сытыытык туралларынан, доруобуйа харыстабылыгар ханнык эбийиэктэри тутуохтаахпытын былааннанан олоробут. Манна биһиги бэйэбититтэн эбии үбүлээһини булуохпут. Эһигиттэн кардиология киинин тутууга 1 млрд солкуобайы, онкология киинигэр – 3 млрд солк. көрдүүбүт”, — диэн бэлиэтиир.
Онуоха Юрий Трутнев Уһук Илин регионнар сайдыыларын министиэристибэтигэр туһаайан, тутуулар бырайыактара бэлэм буоллаҕына, бу кииннэри тутууга үбүлээһин барыйааннарын көрдүүргэ эттэ. Министиэристибэ бу боппуруоһу үс нэдиэлэ иһинэн үөрэтэн, ырытан Юрий Трутневка отчуоттуурга сорудах ылла. Санатан эттэххэ, былырыын балаҕан ыйыгар Дьокуускайга искэҥ ыарыыны эмтиир киин бастакы сыбаайатын түһэрбиттэрэ.
Манна сыһыаран Егор Борисов Уһук Илин регионнары сайыннарыынан Саха сирэ федеральнай бырагыраамалартан сылга 45 млрд солк. ыларын бэлиэтиир. «Ити сүрдээх улахан көмө. Уһук Илин регионнарга болҕомто ууруллан, хас биирдии бырагыраамаҕа бу регионнарга туспа пуун көрүллүбүтүн түмүгэр ситиһилиннэ. Салгыы да бырагыраамалар бу курдук көдьүүстээхтик үлэлиэхтэрэ дии саныыбын», — диэн этэр кини.
Юрий Петрович манна сыһыаран Уһук Илин регионнар сайдыыларын чэрчитинэн Саха сиригэр былааннаммыт сэттэ тутуу 2020 сылга диэри үлэҕэ киириэхтээҕин туһунан эттэ. “Билигин Уһук Илин регионнарга барыта 1200 инвестиционнай бырайыак былааннанан турар. Итилэри олоххо киллэрэргэ, салгыы үлэлэтэргэ нэһилиэнньэ олорор усулуобуйатын, олоҕун-дьаһаҕын тупсарыахпытын наада. Манна анаан 68 млрд солк. көрөн турабыт. Саха сиригэр үөрэх уонна доруобуйа харыстабылын эйгэлэригэр сэттэ эбийиэк тутуллуохтаах. Бу тутууларга 1,7 млрд солк. барыахтаах этэ. Ол эрээри бу бүтэһиктээх испииһэк буолбатах. Үбүлээһин кээмэйин улаатыннарыахпытын сөп”, — диэн бэлиэтиир. Бу тутуулары СӨ бырабыыталыстыбатын бэрэссэдээтэлэ Евгений Чекин хонтуруоллуоҕа.
Даҕатан эттэххэ, бүгүн Ил Дархан Егор Борисов, вице-премьер Юрий Трутнев Перинатальнай киини астылар. Бу киин РФ бэрэсидьиэнэ Владимир Путин быһаччы көҕүлээһининэн тутулунна.
Аграфена КУЗЬМИНА, “Саха сирэ” хаһыат, edersaas.ru