«Сэргэлээх уоттара» култуура киинэ ырыа сүгүрүйээччилэрин муста. Ыам ыйын 5 күнүгэр Саха Өрөспүүбүлүкэтин норуодунай артыыстара Алексей, Екатерина Егоровтар салайар «Сэргэлээх сулустара» устуудьуйаларын иитиллээччилэрин отчуоттуур кэнсиэрдэрэ буолан ааста.
Устуудьуйа оҕолоро Альберт Яковлев, Сулусчаана Анэта Ковальска, Элеонора Иванова, Иннокентий Винокуров, Елизавета Филиппова, Айталина Адамова, Михаил Скрябин, Анастасия Николаева, Феодосий Ефремов, Алина Охлопкова, Алена Домотова, Ньургун Эверстов, чахчы да, Сэргэлээх «сулустара» буолан сыдьаайаннар, үгүс дьон биһирэбилин ылаллар, үтүө атас-доҕор тапталын билэллэр.
«Алексей Васильевич уонна Екатерина Борисовна курдук маастардарга уһуйулларбыт — улахан дьол. Мин 2021 сыллаахтан дьарыктанабын. Устудьуон сылларбын ыллаан киэргэттим. Былырыын Самара куоракка «Устудьуон сааһа» диэн куонкуруска иккис истиэпэннээх лауреат буолбуппут. Быйыл бу тэрээһин ыам ыйын 26 күнүттэн бэс ыйын 1 күнүгэр диэри Пермь куоракка ыытыллыаҕа. Уһуйааччыларым көмөлөрүнэн утумнаахтык дьарыктанан үһүспүн кытта бараары бэлэмнэнэ сылдьабын «, — диэн ХИФУ математика уонна информатика институтун 4 кууруһун устудьуона Сулусчаана Анэта Ковальска кэпсээтэ.
Култуура киинин дириэктэрэ Алексей Константинов уонна оҕолор уһуйааччыларыгар эҕэрдэлэрин, махтал маанытын эттилэр, сибэкки дьөрбөтүн туттардылар. Көрөөччүлэр ортолоругар баар эдэр толорооччулар аймахтара, чугас дьонноро, доҕотторо өйүүллэрин, киэн туттар көрүүлэринэн, таптаабыт харахтарынан одуулуулларын, ытыс тыаһын дохсуннук бэлэхтииллэрин көрөргө астык этэ.
«Сэргэлээх сулустарыгар» уонна Алексей, Екатерина Егоровтарга салгыы айымньылаахтык айа-тута, дьоҥҥо-сэргэҕэ кэрэ бэлэхтээх, алыптаах ырыа аргыстаах сылдьалларыгар баҕарабыт!