«Сэргэлээх уоттара» култуура киинэ ырыа сүгүрүйээччилэрин муста. Ыам ыйын 7 күнүгэр Саха Өрөспүүбүлүкэтин норуодунай артыыстара Екатерина, Алексей Егоровтар салайар «Сэргэлээх сулустара» устуудьуйаларын иитиллээччилэрин отчуоттуур кэнсиэрдэрэ буолан ааста.
Устуудьуйа оҕолоро Ньургун Эверстов, Айсена Яковлева, Алина Охлопкова, Валентина Манчурина, Дарина Сысолятина, Аяна Константинова, Айталина Адамова, Алена Домотова, Альберт Яковлев, Василий Иванов, Анастасия Николаева, Илья Иванов, Владислав Алексеев, чахчы да, Сэргэлээх «сулустара» буолан сыдьаайаннар, үгүс дьон биһирэбилин ылаллар, үтүө атас-доҕор тапталын билэллэр.
«Алексей Васильевич уонна Екатерина Борисовна курдук маастардарга уһуйулларбыт — улахан дьол. Мин 2019 сыллаахтан дьарыктанабын. Устудьуон сылларбын ыллаан киэргэттим. «Устудьуон сааһа» куонкуруска кытта сылдьыбытым», — диэн ХИФУ юридическай факультет магистратуратын 1 кууруһун устудьуона Алина Охлопкова кэпсээтэ.
Оҕолор уһуйааччыларыгар эҕэрдэлэрин, махтал маанытын эттилэр. Көрөөччүлэр ортолоругар баар эдэр толорооччулар аймахтара, чугас дьонноро, доҕотторо өйүүллэрин, киэн туттар көрүүлэринэн, таптаабыт харахтарынан одуулуулларын, ытыс тыаһын дохсуннук бэлэхтииллэрин көрөргө астык этэ.
«Сэргэлээх сулустарыгар» уонна Алексей, Екатерина Егоровтарга салгыы айымньылаахтык айа-тута, дьоҥҥо-сэргэҕэ кэрэ бэлэхтээх, алыптаах ырыа аргыстаах сылдьалларыгар баҕарабыт!