Бу өрөбүлгэ Чурапчыга, “Айылгы” култуура киинигэр, маннык ааттаах көрсүһүү буолан ааста.
edersaas.ru
Тарбахтарыгар талааннаах дьоммут тигэн, оҥорон таһаарбыт бииртэн биир кэрэ көстүүлээх оҥоһуктара киһини эрэ сөхтөрөр, астыннарар. Сылаҥ олоҕун-дьаһаҕын көрдөрөр быыстапка барыбытын биир тыыҥҥа холбоото, төрөөбүт-үөскээбит нэһилиэкпитинэн киэн туттуу ыга кууста. Профессор Георгий Башарин аатынан Сылаҥ орто оскуолата “Аныгы сайдыы оскуолата” диэн саҥа бырагырааматын билиһиннэрэн дьон интэриэһин тарта.
Салгыы уус-уран самодеятельность көрүүтүн кыайыылаахтарын кэнсиэрэ буолла. Харахпыт ортотугар улаатан эрэр уолаттардаах Борисовтар дьиэ кэргэн инструментальнай ансаамбыллара сүргэни көтөҕөр, тыыннаах муусуканан дууһаны манньытар. Ыал аҕата Айсен Гаврильевич сөптөөх суолу талан оҕолорун (бары уолаттар) кэрэ эйгэтигэр уһуйбута атыттарга холобур буолар. Ийэлэр, эбээлэр “Күбэйэ” ансаамбыллара бэрт үчүгэй үҥкүүнү бэлэхтээтилэр. Сыаҥка сонун истиилинэн (куукула тыйаатырын курдук) туруоруллубута интэриэһи тарта, дэлби күллүбүт, үөрдүбүт. “Кэрэ ситим” үҥкүү куонкуруһун кыттыылаахтара Максимовтар дьиэ кэргэнинэн Андижанскай үҥкүүнү көрдөрбүттэрэ көрөөччү биһирэбилин ылыан ылла. Сыана бэтэрээнэ Федор Трофимов куолаһа аһыллан иһэриттэн астынныбыт.
Нэһилиэк баһылыга Егор Сивцев тэрилтэлэр салайааччыларын кытары тахсан, ырыа ыллаан доллоһутаннар, кэнсиэри сиэрин ситэрэн, кырдьык да маннык салайааччылардаах нэһилиэк инникилээх, сайдыылаах диэн санааҕа киирэн, олус астынан, киэн туттан тарҕастыбыт.
Клара МАКАРОВА, Чурапчы Сылаҥ,
«Саха сирэ» хаһыат, edersaas.ru сайтка анаан.