Бочкарева Анастасия Романовна 1961 сыллаахха олунньу 8 күнүгэр Мэҥэ Хаҥалас улууһугар I Мөҥүрүөн нэһилиэгэр төрөөбүтэ. 1965 сыллаахха дьоммут Тарат отделениетыгар көһөн кэлбиттэрэ, онон улааппыт, олохсуйбут сирбит – Тарат.
Настя Тарат алын сүһүөх оскуолатын 1971 сыллаахха бүтэрбитэ, төрдүс кылаастан Төҥүлүгэ үөрэммитэ. Оскуоланы бүтэрээт, биир сыл ыанньыксыттаабыта уонна Дьокуускайдааҕы 8 №-дээх ПТУ-ҕа иистэнньэҥ идэтигэр үөрэнэ киирбитэ. 1981-1982 сылларга Аллайыаха улууһун Чокурдаах бөһүөлэгэр, 1982-1983 сылларга Төҥүлүтээҕи быткомбинакка иистэнньэҥинэн үлэлээбитэ. 1983-1985 сылларга Намнааҕы педучилищеҕа черчение уонна үлэ уруогун учууталын идэтигэр иккис куурустан үөрэммитэ. 1985-1986 сыллардаахха Өлүөхүмэ куоратын 1 №-дээх оскуолатыгар домоводствоны биэрбитэ. 1986-1991 сылларга СГУ Педагогическай факультетыгар ИПО-86-1 технология учууталын идэтигэр уһуйуллубута. 1991-2019 сыллардаахха А.С. Шахурдин аатынан Төҥүлүтээҕи орто оскуолаҕа 28 сыл устата халбаҥнаабакка технология учууталынан үлэлээбитэ, бары сыратын төрөөбүт оскуолатын сайдыытыгар биэрбитэ. СӨ үөрэҕин туйгуна, үрдүкү категориялаах учуутал, үлэ бэтэрээнэ.
Эдьиийбит, балтыбыт кылгас олоҕун кэпсээнэ итинник. Бу орто дойдуга баара-суоҕа 58 эрэ сыл олорон барда. Үлэтин, чугас дьонун туһа диэн олорбута.
Настя тоҕус оҕолоох Зинаида Васильевна уонна Роман Дмитриевич Бочкаревтарга бэһис кыыс оҕонон күн сирин көрбүтэ. Кыра эрдэҕиттэн бэрт боччумнаах, үгүс саҥата суох, аргыыйдык бэйэтэ тугу эмит бооччойо сылдьар буолара. Идэтин эрдэттэн билбит курдук, ас астыырын, иистэнэрин олус сөбүлүүрэ. Куукулаларыгар таҥас тигэрэ, уруһуйдуура. Олус үчүгэй ыраас буочардааҕа.
Оскуола кэнниттэн бэйэтэ иистэнньэҥ идэтигэр үөрэнэ училищеҕа киирбитэ, ол кэнниттэн эмиэ кимтэн да ыйыта барбакка Намнааҕы педагогическа училищеҕа технология учууталын идэтигэр үөрэммитэ уонна университекка киирэн үрдэтиммитэ. Үөрэҕэр олус кыһамньылаах этэ, ылыммыт соругун хайаан да толорор мөккүөрдээҕэ.
Төрөөбүт дойдутугар кэнчээри ыччаты кэрэҕэ, үтүөҕэ уһуйбута, кыыс оҕону алаһа дьиэ маанылаах хотуна буоларга бэлэмнээн, бары сатабылга дьаныһан үөрэппитэ. Ис дууһатын, бары күүһүн-кыаҕын биэрбит буолан, кини суолун батыспыт, кини идэтин баһылаабыт кыргыттар элбэхтэр. Птицына Матрена Михайловна Тумул орто оскуолатыгар, Попова Любовь Дмитриевна Үөһээ-Бүлүү улууһун Нам орто оскуолатын технология учууталлара, М.Н. Федорова – Санкт-Петербург куоракка Технология уонна дизайн университетын бүтэрэн, “технолог художественной обработки металлов” идэлээх, Диана Александровна Баишева Дьокуускай куоракка «Модун» спорт национальнай көрүҥнэрин киинигэр производственнай- тиэхиньиическэй лаборатория салаатын начальнига, Александра Анатольевна Свинобоева Художественнай училище преподавателэ, Елена Ивановна Максимова Новосибирскайдааҕы судаарыстыбаннай архитектура уонна уус-уран академияны бүтэрэн, Санкт-Петербург куоракка таҥас дизайнерынан үлэлиир. Диана Афанасьевна Кычкина Владивосток куоракка Технология уонна сервис кэллиэһигэр үөрэнэр. Намнааҕы педагогическай кэллиэһи ситиһиилээхтик бүтэрбиттэрэ: Е.Ф. Попова – Ньурба улууһун Марха орто оскуолатын учуутала, В.В. Стручкова – ДОУ «Чэчир» эбии үөрэхтээһин педагога, Агафья Гаврильева – Үөһээ Бүлүүтээҕи Сургуулук орто оскуолатын учуутала, Н.П. Лыткина — Сунтаар орто оскуолатын учуутала, М.Е. Баишева — технология учуутала, А.И. Вырдылина — Уус Алдан Мындааба орто оскуолатын учуутала, Е.Н. Баишева — ХИФУ ПИ технология кафедратын устудьуона уонна билигин үөрэнэ сылдьаллар: М.Е. Шестакова, С.Е. Сотникова, Н.И. Алексеева, К.В. Кычкина, Д.Н. Максимова, М.К. Дьяконова; Дьокуускайдааҕы дизайн уонна технология кэллиэһин Л.А. Баишева, М.И. Колесова бүтэрдилэр; Айгылаана Борисова — Төҥүлү орто оскуолатыгар үөрэх уонна оҥорон таһаарыы киинин маастара.
Бу кыргыттар бары уруогу таһынан Анастасия Романовна салайбыт «Мастерица”, “Сахалыы төрүт иис”, “Лоскутная мозаика” куруһуоктарыгар уонна оҕуруону тиһии, аппликация дьарыктарыгар хастыы эмит сыл дьаныһан үөрэммиттэрэ. Анастасия Романовна 2008 сылтан И.Е. Винокуров аатынан Намнааҕы педагогика кэллиэһин кытары үлэлэспитэ. 2015 сылтан Төҥүлү орто оскуолатыгар Үөрэх уонна оҥорон таһаарыы киинин 1960 с. «Швея» кууруһун преподавателэ этэ. Үөрэппит оҕолоро эксээмэннэрин бары “5” сыанаҕа көмүскүүллэрэ. Оскуоланы бүтэрэллэригэр кыргыттар иистэнньэҥ идэтин баһылаан, иккис разрядтаах швея докумуон ылаллара. Нам кэллиэһин комиссията оскуолаҕа кэлэн чугастааҕы оскуолалары кытары холбоон эксээмэн тутара. Онон оҕолор ханна да айанныы барбакка, дьиэлэриттэн олорон үөрэххэ киирэллэрин ситиспитэ.
Анастасия Романовна сылын аайы өрөспүүбүлүкэҕэ, улууска ыытыллар быыстапкаларга, научнай-практическай кэмпириэнсийэлэргэ, олипиадаларга оҕолору кытыннарара, “JuniorSkills” улуустааҕы талар түһүмэҕэр, улуустааҕы технология олимпиадатыгар солбуллубат дьүүллүүр сүбэ чилиэнэ этэ. Үгүс сыралаах үлэтин түмүгэр 2008 сыллаахха Бүтүн Арассыыйатааҕы технология олимпиадатын муниципальнай түһүмэҕэр Екатерина Попова 1 миэстэ, 2009 сыллаахха Аня Стручкова 4 миэстэ, 2011 сыллаахха Лена Баишева 1 миэстэ, 2013 сыллаахха Сардаана Сотникова 3 миэстэ, 2016 сыллаахха Света Борисова 3 миэстэ уонна өрөспүүбүлүкэтээҕи научнай-практическай кэмпириэнсийэҕэ 1 миэстэ, Света Ноговицына (2017, 2018, 2019 сс.) 1 миэстэни ситиһэннэр учууталларын үөрдүбүттэрэ. Диана Баишева Чебоксары куоракка буолбут Бүтүн Арассыыйатааҕы технология олимпиадатыгар 2 миэстэлээх, Дайаана Максимова (2018 с.) Чебоксарыга ыытыллыбыт кэтэхтэн II научнай-прктическай кэмпириэнсийэ ааҕыыларыгар “Мир юными глазами» «Изготовление панно по технике «Пэчворк»» лауреат дипломун ылыыта, Света Ноговицына (2019 с.) олимпиада эрэгийиэннээҕи түһүмэҕэр бастаабыта улууска да, өрөспүүбүлүкэҕэ даҕаны сэдэх кыайыы этэ. Ахсаана биллибэт элбэх быыстапкалар, кэмпириэнсийэлэр көрдөрүүлэрэ, айар бырайыактара эмиэ кыайыы көтөллөөхтөрө. 2014-2019 сс. айар бырайыактары көрүү улуустааҕы, эрэгийиэннээҕи түһүмэхтэригэр Света Ноговицына, Дайаана Максимова кыбытык тигиигэ, Света Борисова күрүчүөгүнэн өрүүгэ, аппликацияҕа бастаабыттара. Бу барыта учуутал илиитин араарбакка, өйүн-санаатын барытын ууран, дьаныардаахтык үлэлээбитин туоһута. Оҕолору дьиэтигэр кытары аҕалан дьарыктыыра, иннэтигэр, сабыгар, араас кыптыыйдарыгар, сорох ардыгар куоракка хонор сирдэригэр тиийэ бэйэтэ булара, хааччыйара.
«Сайдыс кыһата» (2014, 2015 сс.) диэн 7-8 кылаастарга бэйэтин уруок таһынааҕы дьарыктарын уопутуттан Төҥүлүгэ уонна Майаҕа көрдөрбүтэ. Улууска ыытыллыбыт технология учууталларыгар аналлаах сэминээрдэргэ оҕуруонан, соломонон үлэҕэ маастар-кылаастары ыыппыта, педагогическай ааҕыыларга «Оҕону айар үлэ бырайыактарын оҥорууга үөрэтии» араас ньымаларын билиһиннэрэр дакылаат аахпыта, санаатын үллэстибитэ. Оскуолатыгар технология учууталларын холбоһугун өр сылларга салайбыта. Эдэр саҥа үлэлиир учууталларга настаабынньык этэ.
Мэҥэ Хаҥалас улууһун норуотун маастара, «Кэрэли» улуустааҕы эбии үөрэхтээһин киинин педагога, Төҥүлү орто оскуолатын «Хозяюшка» иис куруһуогун салайааччыта Светлана Ивановна Толстякова 2019 сыллаахха бу курдук бэлиэтээн суруйбута: “Анастасия Романовна хас биирдии үөрэнээччитин ис кыаҕын, таһымын көрөн дьарыктыыр. Куруһуогар кыргыттар сөбүлээн дьарыктаналлар. Сүрүннээн оҕолору иискэ, баайыыга, оҕуруонан үлэҕэ, кыбытыктаах тигиигэ уһуйар. Хайа баҕарар педагог, учуутал оҕолору үөрэтэр, уһуйар туспа, ураты ньымалардаах, көрүүлээх буолар. Анастасия Романовна оҕо бэйэтэ толкуйдаан таһаарарын, эппит тылын, туруоруммут соругун толорорун ирдиир, айар дьоҕуру сайыннарыыга араас бырайыактары оҥорторор, быраактыкаҕа сүрүн болҕомтотун уурар учуутал. Оҕону оҕоҕо тэҥнээбэккэ, оҕо тус бэйэтин кыра да ситиһиитин көрөн хайҕаатахха, барахсан үөрэн, сүргэтэ көтөҕүллэн үлэлиэх баҕа санаата үрдүүрүн педагог бэлиэтии көрөр, көмөлөһөр. Анастасия Романовна кэбиниэтэ аҥардас кинигэнэн эрэ буолбакка, оҕону уруокка эбии дьарыктыыр, сайыннарар дидактическай, методическай матырыйаалларынан, аныгы үйэҕэ эппиэттэһэр тиэхиньиичнскэй ньымаларынан туолбут тупсаҕай көстүүлээх. Иистэнэргэ, ас астыырга аналлаах 2 сиэксийэҕэ арахсар. 2013 сыллаахха Анастасия Романовна кэбиниэтэ улууска ыытыллыбыт кэбиниэттэри көрүү күрэҕэр 3 миэстэ буолбута”.
Балтыбыт, эдьиийбит хас биирдии оҕоҕо кыһамньылааҕа үөрэнээччитигэр анаан суруйбут махтал суругуттан да көстөр. «Күндү үөрэнээччим Света!
Эйигин «Тиһэх чуораан» бырааһынньыгынан итиитик-истиҥник эҕэрдэлиибин! Света, үөрэххэ дьаныаргынан, үлэҕэ дьулуургунан араас таһымнаах быыстапкаларга, технология олимпиадаларыгар, научнай кэмпириэнсийэлэргэ үрдүк ситиһиилээхтик кыттаҥҥын улууска, өрөспүүбүлүкэҕэ, Бүтүн Арассыыйаҕа оскуолаҕын, дойдугун үтүөтүк ааттаппыккынан киэн туттабын, истиҥник махтанабын. Оскуолаҕа ылбыт билииҥ, ситиһиилэриҥ эйигин үрдүккэ кынаттаатыннар, саҥа саҕахтары арыйаргар тирэх буоллуннар. Эксээмэннэргин ситиһиилээхтик туттаран, сөбүлээн талбыт идэҕэр киирэн, айар-тутар талааҥҥын, дьоҕургун өссө сайыннаран, кэскиллээх үтүө үлэһит буолаҥҥын, төрөөбүт дойдуҥ чэчирии сайдарыгар бэйэҥ кылааккын киллэриэҥ диэн эрэнэбин. Олох киэҥ аартыгар эрэллээх айаны, саныыр санааҥ ыраас, ыралыыр ыраҥ сырдык, талаһар баҕаҥ үрдүк буоллун! Эҕэрдэни кытта учууталыҥ Анастасия Романовна. Ыам ыйын 25 күнэ, 2019 сыл».
Анастасия сэмэй, уйан киһи этэ. Кыраттан да олус үөрэрэ, хаҕыс көрүүттэн да хомойоро. Дьону үөрдэрин сөбүлүүрэ, бэлиэ күннэри көтүппэккэ эҕэрдэлиирэ. Ыраахтан айаннатан кэлэрбитин долгуйа күүтэрэ, дэлэй астаах остуолун тардара. Сир астыырын, оҕуруотун бүөбэйдиирин, сибэкки, араас үүнээйилэри олордорун ордороро, дууһалыын сынньанара. Күһүн араас салааттарынан, барыанньаларынан күндүлүүрэ, ааппытын суруйан хас биирдиибитигэр бэлэмниирэ. Ыраас сииктээх, уурбут-туппут курдук тигэр иистэнньэҥ бэрдэ этэ. Билигин бары кинини суохтуубут, эрдэ бу олохтон барбытыттан хомойобут.
Балтыбыт, эдьиийбит Анастаия Романовна сырдык аата хаһан да умнуллубатын, үөрэппит оҕолоругар кини үлэтэ салҕана туруохтун. Үлэлээбит оскуолатыгар бэйэтэ тэрийбит кэбиниэтигэр кини аатын иҥэрэн үйэтитиэхпитин баҕарабыт. Настябыт барахсан уран тарбаххын ууран айбытыҥ, үөрэппитиҥ сүппэккэ арчылыаҕа, сэмэйдик санатыаҕа.
Бииргэ төрөөбүт эдьиийдэрэ, бырааттара, балтылара.