Бүгүн Дьокуускайдааҕы духуобунай семинарияҕа устудьуоннар VIII Свято-Иннокентьевскай духуобунай-сырдатар форумнара аһылынна.
edersaas.ru
Суолталаах тэрээһин икки күн устата ыытыллыаҕа. Ыччат духуобунай-сырдатар форумугар Ил Дархан Айсен Николаев кыттыыны ылла. Өрөспүүбүлүкэ аҕа баһылыга сыл аайы ыытыллар ыччаты түмэр тэрээһин тэрийээччилэригэр — Нуучча православнай Таҥаратын дьиэтин Дьокуускайдааҕы епархиятыгар, Дьокуускайдааҕы уонна чуолаан Ленскэйдээҕи архиепископ Ромаҥҥа ыччаты сырдыкка кэрэҕэ уһуйар кэскиллээх үлэни ыыталларыгар ис сүрэҕиттэн махтанна.
— Ыччат духуобунай форума Дьокуускайдааҕы епархия 150 сылын чэрчитинэн ыытыллыбыта ордук улахан суолталаах. Саха сиригэр духуобунай сырдатыыга үлэни саҕалаабыт Сибэтиитэл Иннокентий аатын ыччаттар үйэтиллэрэ хайҕаллаах суол. Ыччат маннык тэрээһиннэртэн православнай үөрэхтээһин туһунан билиини иҥэринэр, — диэн бэлиэтээн туран, Ил Дархан Айсен Николаев форум кыттыылаахтарыгар дириҥ ис хоһоонноох тэрээһиннэригэр үгүс ситиһиини баҕарда.
Дьокуускайдааҕы уонна Ленскэйдээҕи Архиепископ Роман:
— Сибэтиитэл Иннокентий Арассыыйа уонна Саха сирин историятыгар улахан оруоллах киһи. Ыччат кини олоҕун холобуругар хайаан да үөрэнэрэ наада, — диэн бэлиэтээтэ.
Форум дириҥ ис хоһоонноох бырагыраамалаах: бырааһынньыктааҕы молебентан саҕалаан, саҥа кинигэлэри сүрэхтээһин, араас кэнсиэрдэр буолуохтара.
Тэрээһиҥҥэ Дьокуускай куорат оскуолаларын үөрэнээччилэрин, устудьуоннарын тэҥэ өрөспүүбүлүкэ улуустарыттан, дойду араас куораттарыттан ыччаттар кыттыыны ылаллар.
Олег Белеснай Амурскай уобалас Белогорскай куоратыттан кэлбит.
— Мин тэрээһин туһунан инстаграмтан билэн кэлбитим. Алданнааҕы Таҥара дьиэтин үлэһиттэрин кытта билсэн баран, кинилэр оройуоннарыттан форум дэлэгээттэринэн талыллыбыт уолаттары кытта пуойаһынан кэллим. Икки күнү быһа бары тэрээһиннэргэ актыыбьынайдык кыттар баҕалаахпын, — диэн санаатын үллэстэр эдэр киһи.
Ыччат духуобунай форумугар хаартыскаҕа, видеоҕа уста сылдьар ыччат үгүс. Кинилэртэн биирдэстэрин кытта анаан көрсөн кэпсэттим. Анастасия Егорова форумҥа кыттыытын туһунан бу курдук кэпсээтэ:
— Мин православнай үөрэҕи ылынар ыччат бөлөҕөр иккис сылбын сылдьабын. Форумҥа наһаа элбэх ыччат кытта кэлбит. Ол курдук, Алдан, Нерюнгри, Ленскэй куораттан кэлбит ыччаттары кытта билистим. Ыччаттар тэрээһиммитигэр Ил Дархан Айсен Николаев кыттыыны ылбыта санаабытын кынаттаата. Мин доҕотторбун кытта араас аһымал аахсыйалары тэрийэбит, кырдьаҕастарга-кыамматтарга дьиэлэригэр тиийэн көмөлөһөбүт.
Ити курдук, ыччаттар икки күн устата духуобунай сырдыкка, кэрэҕэ тардыһар санааларын, үлэ уопутун ирэ-хоро атастаһыахтара.
Елена ПОТОЦКАЯ, «Саха сирэ» хаһыат, edersaas.ru
Хаартыскаҕа Анатолий Шестаков, Анастасия Егорова уонна ааптар түһэриилэрэ.