Бу күннэргэ олох араас хайысхатыгар сыллааҕы үлэ түбүктэрин түмүктэрэ таһаарыллан, үөрүүлээх сурахтар тилийэ көтөллөр.
edersaas.ru
«Тускул» Култуура кииниттэн Наталья Руфова иһитиннэрбитинэн, Хатастааҕы норуодунай тыйаатыр (режиссер Е.Е.Семенова) сылы быһа тигинэччи үлэлээн, этэргэ дылы, кэннин хайыстаҕына кэпсиирдээх, сэргэстэһэ олордоҕуна сэһэргиирдээх буолла.
Наталья РУФОВА:
— Олортон биир саҥа хайысханы — араадьыйа-испэктээк, уус-уран ааҕыы диэннэри тутуһаммыт, кимиилээхтик, хорутуулаахтык үлэлээбиппит түмүгэ билиннэ. Ол курдук, Мэҥэ Хаҥалас улууһун Ходулов аатынан Майатааҕы норуодунай тыйаатыр көҕүлээһининэн »Маҥнайгы» диэн ааттаах араадьыйа-испэктээк көрүүлэрин түмүгүнэн, «Дьахтар бастыҥ оруола» диэн биир сүрүн анал ааты Саргылана Сивцева ылла.
Манна даҕатан эттэххэ, Саргылана Николаевна тыйаатырга бэрт соһуччу, дьиҥ бэйэтин баҕа санаатынан кэлбитэ.
»Сэрии кэмиттэн лоскуйдар» диэн кинигэни тыйаатырбыт артыыстара аахпыттарын куйаар ситиминэн көрөн-истэн баран, аныгыскыга миигин ыҥыраарыҥ диэн баҕа санаатын биллэрбитэ. Ол кэннэ, сүтэрбитин булбуттуу, күүстээх, хорутуулаах, түбүктээх үлэ түмүгүнэн сыл иһигэр 4 улахан оруолу оонньообутуттан биирэ дьоһун дьоннордоох дьүүллүүр сүбэ үрдүк сыанабылын ылла. Бу кыайыы «Тускул» Култуура киинэ »Ааптардары кытта үлэ» диэн бырайыак чэрчитинэн тыйаатыр хайысхатыгар үлэҕэ кэллэ. Кэпсээн ааптара Оксана Павловна Гаврильева-Айсаана — эмиэ биһиги биир дойдулаахпыт, эргиччи талааннаах Далбар хотун.
Бу үлэ «Тускул» иһинэн үлэлиир »Үйэ» аудиовизуальнай устуудьуйа (сал. А.В. Иванов, В.А.Чепалов) баар буолан уонна »Тэтим» араадьыйа »Култуура долгуна» биэрии эрэдээктэрэ Иван Тарасовы кытары ыкса сибээстээхтик, таһаарыылаахтык үлэлээһинтэн таҕыста.
Надежда ЕГОРОВА, «Саха сирэ» хаһыат, edersaas.ru
Хаартыска Н.Руфова тиксэриитэ.