Оскуола оҕолорун сааскы сынньалаҥнарын көрсө 16-с төгүлүн ыытыллар “Саха ыччатын — промышленноска” бырайыак кыттааччылары сүүмэрдиир түһүмэҕэ буолла. Бу бырайыак 2009 сылтан саҕалаан “Я — ИНЖЕНЕР” уопсастыбаннай холбоһук уонна “Эдэр саас” ыччат хаһыата көҕүлээһиннэринэн, ыччаты промышленность эйгэтигэр сыһыарар сыаллаах тэриллибитэ.
Варвара Попова, “Саха сирэ” хаһыат, https://edersaas.ru
Өрөспүүбүлүкэбит араас улууһуттан: Томпо, Чурапчы, Уус Алдан, Амма, Таатта, Бүлүү, Сунтаар, Горнай, Хаҥалас уонна Дьокуускай оҕолоро тутар хамыыһыйа тургутуутун аастылар.
Хамыыһыйа техническэй хайысхаҕа үөрэнэ барыан баҕалаах, промышленность эйгэтин сэҥээрэр, “Эдэр саас” ыйытыктарыгар эппиэттээбит 40-ча оҕоттон 24 оҕону сүүмэрдээтилэр. Кинилэр бу ый 18-28 күннэригэр Саха сирин промышленнай тэрилтэлэрин үлэлэрин билсэ, объектарынан экскурсияҕа сылдьыахтара, үлэлии-хамныы сылдьар дьоннуун сэһэргэһиэхтэрэ.
Бырагыраама чэрчитинэн, бырайыак кыттыылаахтара “АЛРОСА” АК объектарын, Светлэйдээҕи уу электростаницятын, “ЛенскГаз” ААО газ скважинатын буурдуур үлэтин, “Алмаздортранс”, “Газпром Трансгаз Томск” оҥорон таһаарар управлениелар объектарын о.д.а. интэриэһинэй сирдэри көрүөхтэрэ. Экспедиция Дьокуускай – Кыһыл-Сыыр – Сунтаар – Миирнэй – Ленскэй хайысханан айанныаҕа.
Бырайыак туһунан сиһилии манна аах.
Варвара Попова, “Саха сирэ” хаһыат, edersaas.ru