«СЫП» экспедиция кыттааччылара «Полюс Алдан» көмүс хостуур хампаанньаҕа сырыттылар
»Саха ыччатын — промышленноска» экспедиция кыттааччылара «Полюс Алдан» көмүс хостуур хампаанньаҕа сырыттылар.
Оҕолору хампаанньа дириэктэрэ Алексей Носов бэйэтэ көрүстэ, хампаанньатын историятын кэпсээтэ. «Промышленноска үлэлээҥ, хайа үөрэҕэр үөрэниҥ,ттуһалаах идэлэри баһылааҥ», — диэн Алексей Петрович сүбэлээтэ.
Салгыы хампаанньа инженердэрэ оҕолорго анал наушниктаах кааска, ачыкы, бэрчээккэ, сэлиэччик түҥэттилэр. Оҕолор үлэһит тэҥэ таҥнан-симэнэн учаастакка айаннаатылар. Манна карьеры тоҕо тэптэрии хайдах барарын кэпсээтилэр, экспедиция кыттааччылара сири тоҕо тэптэрэр анал үөрэхтээх маастары кытта кэпсэттилэр. Бу тэрилтэ биир туонна руудаттан биир-икки грамм көмүһү булаллар эбит.
Аны баараҕай улахан фабрикаҕа сырыттылар, манна технологынан үлэлиир Татьяна көрүстэ. Кини көмүс хайдах оҥоһулларын, туох идэлээх дьон үлэлиирин кэпсэээтэ, фабрика иһин көрдөрдө. Салгыы бу тэрилтэҕэ үлэлиир тиэхиньикэлэр турар гараастарыгар сырыттыннардылар. Оҕолор хаһан даҕаны харахтаан көрбөтөх «Белаз», «Коматцу» курдук массыыналары көрөн сөхтүлэр. Бу тэрилтэҕэ үлэлиир туһуттан туох идэҕэ үөрэниэххэ сөбүн, орто хамнас кээмэйин, дьахтар-эр киһи үлэтин туһунан ыйыттылар.