Сааскы сынньалаҥ кэмигэр 19-с төгүлүн ыытыллар ыччаты идэҕэ туһаайар эспэдииссийэни “Саха ыччатын – производствоҕа (промышленноска)” «Эдэр саас» таһаарыы уонна «Мин – Инженербин» уопсастыбаннай тэриллии ыытта. Бырайыакка оҕолор кулун тутар бүтүүтэ Дьокуускай куорат уонна Мэҥэ Хаҥалас улууһун оҥорон таһаарыынан дьарыктанар бырамыысыланнас тэрилтэлэрин үлэлэрин кытта билистилэр.
Эспэдииссийэҕэ өрөспүүбүлүкэбит араас улууһуттан – Чурапчыттан, Амматтан, Уус Алдантан, Тааттаттан, Хаҥаластан, Бүлүүттэн, Намтан, Горнайтан уонна Дьокуускайтан сылдьар сүүрбэ онус кылаас үөрэнээччилэрэ тустаах викторина ыйытыктарыгар хоруйдаан, тутар хамыыһыйа тургутугун ааһан кытыннылар.
Быйыл бырайыакпыт ыырын кэҥэтэн, оҕолору бырамыысыланнаһы эрэ буолбакка, оҥорон таһаарыы бары эйгэтин билиһиннэрэр сыалтан, “Саха ыччатын – производствоҕа” диэн ааттаатыбыт.
Нэдиэлэ иһигэр “СЫП” бырайыак кыттыылаахтара Дьокуускайдааҕы ГРЭС-2, “Сахатранснефтегаз” гааһы тарҕатар ыстаансыйатыгар, “ЯТЭК” мотуор уматыгын баазатыгар, “Водоканал” ууну хаайар уонна ыраастыыр саҥа ыстаансыйатыгар, “Якутуголь” Хаҥаластааҕы чох хостуур филиалыгар, “Хаҥалас” индустриальнай пааркаҕа, “Энергосберегающие технологии” тэрилтэҕэ, “Якутия” технопааркаҕа, IT-пааркаҕа, Аллараа Бэстээхтээҕи тимир суол ыстаансыйатыгар, “Саханефтегазсбыт” ньиэби харайар баазатыгар, Майатааҕы уот ыстаансыйатыгар уо.д.а. тэрилтэлэр эбийиэктэрин иһиттэн көрдүлэр, араас идэлээх дьону кытта билистилэр, кэпсэттилэр.
Эспэдииссийэни “Сахатранснефтегаз” АУо эдэр исписэлииһэ, “Мин — Инженербин” уопсастыбаннай тэриллии бэрэссэдээтэлин солбуйааччы Аркадий Турантаев үһүс сылын салайан илдьэ сырытта. Аркадий оскуолаҕа үөрэнэ сылдьан, 2011 сыллаахха, бэйэтэ бу бырайыакка кыттыбыта. Мантан идэтин быһаарынан, салгыы Красноярскай куоракка Сибиир федеральнай университетыгар үөрэнэн, инженер идэтин баһылаабыта.
Бырайыак сүрүн сыала — ыччаты идэҕэ туһаайыы. Эспэдииссийэ кыттыылаахтара араас эбийиэктэр үлэлэрин кытта билсэн, баараҕай тутуулары иһиттэн-таһыттан көрөн, интэриэһинэй үлэлээх дьоннуун алтыһан, инники идэлэрин сөпкө быһаарыналларыгар тирэх оҥостоллор.
КЫТТЫЫЛААХТАР САНААЛАРА
Надежда Макарова, Амма улууһун Болугур орто оскуолатын онус кылааһын үөрэнээччитэ:
— Бу бырайыак туһунан биир дойдулаахтарбыттан – урут “СЫП”-ка кыттыбыт оҕолортон истибитим. Сааскы сынньалаҥ буолан, ол оҕолору кытта Дьокуускайга куруук бииргэ айаннаан кэлэрим уонна онус кылааска таҕыстахпына эспэдииссийэҕэ кытта кэлэрбин ыраланарым. Эспэдииссийэ кэмигэр олус элбэх саҥаны, интэриэһинэйи биллим. Холобура, ГРЭС-2, ГРС, “Водоканалга” сылдьыбыппытын өйдөөн хааллым. Бу хампаанньалар хайдах үлэлииллэрин билбэт этим. “СЫП” көмөтүнэн Дьокуускай куорат оҥорон таһаарыыга тэрилтэлэрин биллим, араас идэ баарын сөхтүм. Сахабыт сирэ сайда турарын илэ харахпынан көрдүм. Манна билбитим-көрбүтүм инники идэбин таларбар көмө буоларыгар саарбахтаабаппын.
Эркин Егоров, Бүлүү улууһун Г.И. Чиряев аатынан Бүлүү 1-кы №-дээх оскуолатын онус кылааһын үөрэнээччитэ:
— Эспэдииссийэттэн үчүгэй эрэ өйдөбүллэр хааллылар. Биһиги атын дьон мээнэ көрбөт эбийиэктэригэр сылдьан, араас тэрилтэлэр хайдах үлэлии туралларын көрдүбүт. Мин ордук “IT-пааркаҕа” уонна “Якутия” технопааркаҕа сылдьыбыппытын сөбүлээтим. Инники идэбин биоинженерияны, биотехнологияны кытта сибээстиир былааннаахпын.
Махтанабыт!
«Саха ыччатын – производствоҕа!» бырайыагы өйөөбүт, үбүлээбит, тэрийсибит хампаанньаларга, министиэристибэлэргэ истиҥник махтанабыт:
СӨ ыччат дьыалатыгар уонна социальнай коммуникацияларга министиэристибэтигэр;
СӨ инновацияҕа, цифровой сайдыыга уонна инфокоммуникационнай технологияҕа министиэристибэтигэр;
СӨ сибээскэ уонна информационнай технологияҕа министиэристибэтигэр;
СӨ култуураҕа уонна духуобунай сайдыыга министиэристибэтигэр;
“Сахатранснефтегаз” АУо-ҕа;
“ЯТЭК” хампаанньаҕа;
“Сахамедиа” холдиҥҥа;
“Техноавиа” хампаанньаҕа;
М.К.Аммосов аатынан Хотугулуу-Илиҥҥи федеральнай университекка;
Дьокуускайдааҕы тыа хаһаайыстыбатын академиятыгар;
Дьокуускайдааҕы кадетскай оскуолаҕа;
Дьокуускайдааҕы ГРЭС-2;
“Водоканал” тэрилтэҕэ;
“Якутуголь” хампаанньаҕа;
“ЯПАК” тэрилтэҕэ;
“Хаҥалас” индустриальнай пааркаҕа;
“Энергосберегающие технологии” тэрилтэҕэ;
“IT-пааркаҕа”;
“Якутия” технопааркаҕа;
“Россия – моя история” историческай пааркаҕа;
Аллараа Бэстээхтээҕи Тырааныспар техникумугар;
Аллараа Бэстээхтээҕи тимир суол вокзалыгар;
“Саханефтегазсбыт” хампаанньаҕа;
“ФСК ЕЭС” Майатааҕы ыстаансыйатыгар;
“Саха” Национальнай көрдөрөр-иһитиннэрэр хампаанньаҕа.
Айтана Аммосова, «Саха сирэ» хаһыат, edersaas.ru