Сыллата ыытыллар «Саха ыччатын — промыленноска» идэҕэ туһаайар экспедиция кыттыылаахтара Амур уобалаһыгар баар «Восточнай» Космодромҥа тиийэ айанныахтара. Экспедицияҕа өрөспүүбүлүкэбит араас улуустарыттан сүүрбэ үөрэнээччи кыттыаҕа.
«СЫП»-ка айанныан баҕарар 70-ча оҕоттон сайаапка туппуппут, биһигини бу сыыппара сылын аайы эбиллэн иһэрэ олус үөрдэр. Дьокуускайтан, Уус Алдантан, Тааттаттан, Бүлүүттэн, Үөһээ Бүлүүттэн, Сунтаартан, Амматтан, Намтан, Горнайтан, Миирнэйтэн, Кэбээйиттэн уонна Хаҥаластан барыта сүүрбэ оҕону викторина уонна сирэй көрсөн кэпсэтии кэнниттэн таллыбыт. Маныаха тохсус кылаас кэнниттэн ОГЭ-ҥэ физиканы уонна химияны туттарбыт буолуохтаахтарын ирдээтибит. Онон, инники идэтин чопчу бырамыысыланнаһы кытта сибээстиир үөрэнээччилэри ыллыбыт. Быйылгы экспедиция киэҥ хабааннаахтык ыытыллар», — диэн экспедицияны тэрийээччилэр кэпсииллэр.
Ол курдук, быйыл экспедиция Уһук Илин таһымыгар ыытыллар. Үөрэнээччилэр уон күн иһигэр «Дьокуускай — Алдан — Нерюнгри — «Восточнай» Космодром — Дьокуускай» хайысхаҕа баар бырамыысалыннас эбийиэктэригэр — «Якутуголь», «Алданзолото», «Колмар», «Селигдар», «Газпром Трансгаз Томск», «Саха сирин тимир суоллара» хампаанньаларга уонна «Роскосмос» госкорпорацияҕа сылдьыахтара, көрүөхтэрэ. Оҕолор айаҥҥа кулун тутар 27 күнүгэр турунуохтара. Бу иннинэ «СЫП» Бүлүү, Миирнэй, Ленскэй улуустарыгар айанныыра.
Санатан эттэххэ, «Саха ыччатын — промышленноска» бырайыагы «Эдэр саас» ыччат таһаарыыта уонна «Мин — Инженербин» уопсастыбаннай тэриллии «Сургутнефтегаз», «Сахатранснефтегаз», «Саханефтегазсбыт», «Анаабыр алмаастара», «АЛРОСА», «ЯТЭК», «Саха сирин тимир суоллара», «Газпром Трансгаз Томск» хампаанньалар көмөлөрүнэн 2009 сылтан саҕалаан ыыталлар. Бырайыак сүрүн сыала — ыччаты идэҕэ туһаайыы. edersaas.ru