Бэрээдэк Маны аах

Сымыйа сэртипикээти туһаныы — холуобунай дьыала

Интэриниэккэ коронавируһу утары быһыыны ылбыты туоһулуур сэртипикээти атыылыылларын туһунан биллэриилэр баар буоллулар. Маны оҥорбут, атыылаабыт уонна атыыласпыт дьон холуобунай эппиэтинскэ тардыллар.

Быһыыны биэрбэккэ эрэ сэртипикээти суруйан биэрии, вакцинаны атын эминэн солбуйуу (холобур, вакцина оннугар битэмиин биэрэн баран, вакциналаах ампуланы утилизациялааһын) Арассыыйа Холуобунай кодексын хас даҕаны ыстатыйатын кэһии буолар. Бу дьайыы РФ ХК 159, 327 ыстатыйаларын кэһиинэн ааҕыллар, ол эбэтэр “подделка, изготовление или оборот поддельных документов” диэн буруй буолар. Сертификат араас эрэгийиэннэргэ туспа быраабы биэрэр докумуон буолар, онон сокуона суох тарҕатыыга кыттааһын икки сыл хаайыллыыга тиийэ накаастаныллыан сөп.

Өскөтүн сымыйа сэртипикээти судаарыстыбыннай эбэтэр муниципальнай тэрилтэ иһигэр оҥорбут буоллахтарына, буруй “служебный подлог” диэн дьайыынан ааҕыллар уонна буруйдаах киһи 80 тыһ. солк. ыстыраааптыан, икки сылга диэри көҥүлэ быһыллыан сөп.

Ону таһынан, бу дьайыы бэрик биэриилээх буолбута дакаастаннаҕына, буруйдаах сирэй 1 мөл. солк. ыстыраапка уонна үс сылга тиийэ хаайыыга уураахтаныан сөп.

Сымыйа сэртипикээтинэн эргиэн иһин атыылааччы эрэ буолбакка, атыылаһаачы эмиэ холуобунай эппиэтинэскэ тардыллар. Холуобунай кодекс 291 ыстатыйатыгар сурулларынан, 500 тыһ. солк. ыстыраабы таһынан бэрик кээмэйин биэс эбэтэр отут төгүллээх сууматын төлөөһүҥҥэ уураахтаныан сөп. 327 ыстатыйаҕа сурулларынан, сымыйа сэртипикээти туһаныы иһин биир сылга тиийэ хаайыыга киириэххэ сөп.

Манна суруллубут ыстатыйалар эппиэтинэс сорҕотун эрэ хоһуйаллар. Сымыйа сэртипикээти туһаныыга кыттааһын Арассыыйа Холуобунай уонна Административнай кодекстарыгар суруллубут улахан буруйдары оҥоруунан буолар. Сокуону кэһимэҥ, доруобуйаҕытын харыстааҥ.

«Саха сирэ» хаһыат, edersaas.ru

Хаартыска sakha.gov.ru

0
0