Бэрээдэк Маны аах Уопсастыба

Сымыйа сурахтары батсаапка тарҕатыы элбээтэ

Бүлүү улууһун батсаап бөлөхтөрүгэр үс нэһилиэк таһыгар  көтөр аал тыа үрдүнэн уматык кутан ааһалларын туһунан сымыйа сурах тарҕатылынна. Бу туһунан “Олох суола” хаһыат суруйда. “Норуот хоруйу ирдиир!” диэн  ис хоһоонноох дойҕохторго батсаабы туһанааччылар 2019 сылтан тарҕанар  суругу билбиттэр. «Олох суола» эрэдээксийэтэ туһааннаах үс нэһилиэк  баһылыктарыттан  бу туһунан тугу билэллэрин туоһуласпыттар. 

Ити сурахха тарҕаммыт  көтөр ааллары  биһиги диэки көрбөтөхпүт. Олохтоох дьон итинник сураҕы тарҕаппаттара чахчы. Бэйэ икки ардыгар итинниккэ майгынныыр сурах-садьык даҕаны суох. Онон биһиги нэһилиэкпит ити сонуҥҥа сыһыана суох. Биһигиттэн 70 килэмиэтирдээх, киһи тиийэрэ ыраах  сиргэ уот күөдьүйбүтэ биллэр. Нэһилиэккэ ураты сүпсүлгэн суох, эйэ дэмнээхтик олоробут – диир “2-с Күүлэт нэһилиэгэ” муниципальнай тэрилии баһылыга.

Үгүлээт нэһилиэгин  баһылыга  Октябрь Лукин итинник сурахтары тарҕатыынан бэрт өр дьарыктаналларын билэрин эттэ:

Кимнээх суруйалларын билбэппит эрээри, 2019 сылтан “ким эрэ сөмөлүөт, бөртөлүөт  көрбүттэр үһү” диэн сурахтар күөдьүйэн кэлээччилэр. Ол геологтар кэлэн  көтө сылдьыбыттара биллибитэ. Бэрт үөрэхтээх киһи илиитинэн суруллубута сэрэйиллэр. Бары тыла сөпкө суруллубут, сопутуойдара, туочукалара миэстэлэригэр тураллар. Ойуур баһаардара биһиги диэки билигин арыый уҕараан турар, уруккутун курдук ыгым буолбатах. Мантан 8 килэмиэтирдээх сиргэ чаҕылхантан күөдьүйбүт 30 нүөмэрдээх  баһаар тарҕаныыта тохтотуллан турар. Ыраах сытар термоточкалар кэтэбилгэ бааллар. Ыксал чугаһаатаҕына дьон көхтөөхтүк кыттар, биир кэмҥэ 20-30 киһи турунар. Бары уопсай кыһалҕабыт буоларын өйдүүр буоллахпыт дии.

Тылгыны нэһилиэгин баһылыга Виктор Федоров:

Хантан итинник сурах тарҕанарын билбэппит эрээри, чопчу биһиги нэһилиэкпититтэн буолбатах. Манна ити туһунан ырытыы суоҕун кэриэтэ. Нэдиэлэ анараа өттүгэр,  50 килэмиэтирдээх сиргэ биир баһаар уонна биир термоточка бэлиэтэммитэ. Нэһилиэнньэ уоту умуруорууга көхтөөхтүк үлэлиир, 50-ча киһи турунар. Буруо аччаата, салгын тыынарга сөптөөх – диир .

Инстаграм ситимҥэ newsykt пабликка бөртөлүөтүнэн утары уот ыытыы ньыманан баһаары умуруоруу ролига тахсыбыт уонна: Бөртөлүөт тыаны уоттуур! Сурутааччыттан: Оттон бу тугу гына сылдьалларый? Сэрэйдэххэ, бөртөлүөт уоттуу сылдьар. Бөлөхтөргө  бу видео тарҕанна. Наһаа ынырык!” диэн суругунан эбии күөртээн биэрбиттэр. Бу IGTV нөҥүө угуллубут 1 мүнүүтэ кэриҥэ усталаах видеоҕа саһархай өҥнөөх омук бөртөлүөтэ ойуур баһаарын таһынан. кырдьык  уот ыыта сылдьара көстөр. Видеону Инстаграм бэйэтэ “сымыйа сурах” диэн бэлиэтээбит. Интэриниэти  көрдөххө, бу видео Канадаҕа, Британскай Колумбия уокурукка 2018 сыллаахха баһаары утары үлэни көрдөрөн уһуллубута биллэн тахсар.

«Саха сирэ» хаһыат, edersaas.ru

Хаартыска sakha.gov.ru

0
0