Куорат аҕа баһылыга Евгений Григорьев суруналыыстары кытары пресс-кэмпириэнсийэҕэ арыгыны атыылыыр маҕаһыыннар үлэлэрин туһунан боппуруоһу таарыйда.
Ил Түмэн күһүҥҥү мунньаҕар сокуоҥҥа уларытыылары киллэрэр туһунан былааннааҕын кэпсээтэ. Ол уларыйыы киирдэҕинэ, 100 кв. миэтэрэттэн кыра иэннээх, арыгыны, пиибэни атыылыыр 42 “сымыйа кафе” сабыллыахтаах.
—Биһиги бастатан туран, 20 кв.м. иэннээх хоско, эбэтэр гарааска баар, 2 пластик остуоллаах уонна пиибэни эрэ атыылыыр “сымыйа кафелары” утары охсуһабыт. Дьиҥэ, полиция сокуоннайа суох атыылыыр эргиэмсиктэри утары көдьүүстээхтик охсуһар. Оттон бу сокуон хайаҕаһынан туһанар, барыһы эрэ сырсар урбаанньыттар. Кинилэр барыһы сырсан, кафеларын 100 кв.м. иэннээх буоларын курдук улаатыннарбаттар, аһы-үөлү астаабаттар, үлэ миэстэтин таһаарбаттар. Ол кэриэтин сабыллыахтара.
Сокуоҥҥа уларыйыы киирдэҕинэ, чиэһинэй урбаанньыттар дьиҥнээх кафены арыйан үлэлэттиннэр ээ. Бу хааччахха 2 кафе-ресторан түбэһэр. Ол эрээри, мин урбаанньыттары кытары көрсөн, кэпсэтэргэ, быыс-хайаҕас көрдүүргэ бэлэммин. Бу сайын 203-с түөлбэ 3 тыһыынчаттан тахса олохтооҕуттан маннык кафелары сабар туһунан илии баттааһыннаах сурук киирбитэ. Бу боппуруос олохтоохтору долгутарын көрдөрөр, — диэн мэр эттэ.
Ангелина Васильева, “Саха сирэ” хаһыат, edersaas.ru
Хаартыска: sakhagov.ru.